Екипата на Наполи со победа од 2-0 попладнево во претпоследното коло од Серија против Фиорентина на гостински терен направи уште еден чекор поблиску до пласман во Лигата на шампионите идната сезона.

Иако тренерот на Наполитанците, Џенаро Гатузо на овој меч не му даде можност за игра на македонскиот репрезентативец, Елиф Елмас, тимот од Неапол со головите на Инсиње (56 минута) и Зиелински (67) минута ги освои трите бода против „виолетовите“ и се искачи на третата позиција на табелата со собрани 76 бода на 37 меча.

Зад Наполи останува Милан кој сега има 75 поени на четвртата позиција (одигран меч помалку, оној вечер против Каљари), додека Јувентус останува петтопласиран исто со 75 бода, но и полош межусебен скор од „Росонерите“.

Фиорентина првенството со сигурност ќе го заврши во вториот дел од табелата.

Бундеслигашот Вердер го отпушти тренерот Флоријан Кохфелт и на негово место го постави добро познатото име во Бремен – Томас Шаф.

„Постои консензус во вакви околности да е промената неопходна за да избегнеме испаѓање“ изјави спортскиот директор на клубот, Франк Бауман.

Вердер вчера загуби со 2-0 нагости кај Аугзбург и сега тимот од Бремен на коло пред крајот на Бундеслигата е во зоната за испаѓање во Цвајта. Вердер во последното коло ја пречекува Борусија Менхенгладбах, но и со победа не му е загарантиран опстанокот во елитната конкуренција.

Шаф ќе го предводи тимот во последното коло и во евентуалниот бараж за опстанок во Бундеслигата.

Кохфелт беше на кормилото на клубот од октомври 2017 година и го спаси тимот од испаѓање минатата сезона.

Новиот тренер е жива легенда на клубот. Го водеше Вердер 14 години, до 2013 година. Во 2004-тата со „зелените“ ја освои „дуплата круна“ – Бундеслигата и Купот на Германија.

Јувентус со вчерашната победа против Интер (3-2) остана во игра за пласман во Лигата на шампионите и идната сезона.
Освен осумте погодоци, љубителите на фудбалот видоа и ретка сцена – Кристијано Роналдо беше повлечен од игра во 70 минута.

Изненадувачкото е тоа што тој не реагираше како и обично во ваква ситуација (демонстративно), туку мирно излезе од теренот, се поздрави со неговата замена Алваро Мората, а се поздрави и со тренерот Пирло.

„Мислам дека ова беше првпат да е среќен што е заменет. Имавме играч помалку, беше среќен во соблекувалната“ рече Пирло.

Тренерот на Јуве е под огромен притисок да биде сменет по завршувањето на сезоната, но тој на тоа вели:

„Не сум размислувал за иднината, само за денешниот меч. За иднината – подоцна“.