Спорт
Чеферин ги брани ПСЖ: Нема Реал Мадрид да ни кажуваат што да правиме!

Претседателот на УЕФА, Александер Чеферин застана во одбрана на Пари Сен-Жермен околу новиот богат оговор за францускиот напаѓач Килијан Мбапе, инсистирајќи дека и Реал Мадрид дале „слична“ понуда.
Француските медиуми тврдеа дека 23-годишниот Мбапе стана најплатениот фудбалер во историјата со потпишувањето на тригодишниот нов договор, нешто што предизвика бура реакции во Шпанија, каде што и Ла лига го пријави клубот пред УЕФА велејќи дека се работи за „скандалозна“ понуда која претставува опасност за илјадници работни места во европскиот фудбал.
Чеферин ги отфрла обвиненијата дека УЕФА ги игнорира прекршувањата на финансискиот ферплеј, посочувајќи на хипокризијата во Шпанија бидејќи Мадрид исто така му нудел богат договор на Мбапе.
„УЕФА има правила за финансиски ферплеј кои се доста стриктни. Кој ќе ги почитува правилата, ќе игра во нашите натпреварувања, кој нема, нема место за него, толку е едноставно. Ниту Реал Мадрид, ниту било кој ќе кажува што ќе прави УЕФА. Тие велат дека има скандал, но според тоа што го знам, нивната понуда беше слична со таа на ПСЖ“, вели Чеферин за „Би-би-си“.
Тој исто така вели дека нема промени на правилата за сопственост на клубовите, откако ПСЖ е во раце на Катар инвестмент ауторити (КИА), државната компанија од Катар, додека Манчестер сити е во сопственост на газди од Обединетите Арапски Емирати.
„Кажете ми еден аргумент зошто тие да не се сопственици на клуб? Ако кажете дека клубовите се во сопственост на фановите, заборавате дека сите англиски клубови имаат сопственици – од САД, од Англија, од Блискиот Исток. Така што ситуацијата е идентична и мака ми е од овие обвинувања без основа“, додава Чеферин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Роналдо нема да патува на турнејата низ Тајланд и Австралија
Манчестер Јунајтед се уште не знае дали Кристијано Роналдо ќе замине со тимот на претсезонската турнеја низ Тајланд и Австралија.
Како што пренесува „Скај спорт“, 37-годишниот Португалец не се појавил во тренинг центарот од семејни причини, што клубот го прифатил. Роналдо изрази желба да го напушти „Олд Трафорд“, во случај да пристигне соодветна понуда, бидејќи сака да игра во Лигата на шампионите.
Тој во понеделник требаше да им се придружи на соиграчите на првиот тренинг, но остана во Португалија каде веќе неколку дена тренира во тренинг центарот на репрезентацијата.
„Скај спорт“ пренесе дека агентот на Роналдо, Жорге Мендеш, поминал неколку недели продавајќи им го на клубпвите „Ефектот Кристијано“, обезбедувајќи им на заинтересираните страни документација за огромните спонзорства на неговиот клиент, популарноста на социјалните мрежи и влијанието на новите пазари.
Меѓу тие клубови е и Челзи, чиј нов ко-сопственик Тод Боли ја разгледува можноста за трансфер. Јунајтед инсистира дека Роналдо не е на продажба, но може да го смени тој став доколку пристигне добра понуда.
Клубот не сака таа ситуација да ја засени работата на новиот тренер Ерик тен Хаг на подготовките или претстојните трансфери.
Роналдо минатата сезона постигна 24 гола во сите натпреварувања и беше најдобар стрелец на клубот. Јунајтед ќе ја започне својата претсезонска турнеја во вторник во Бангкок против Ливерпул, а исто така ќе одигра пријателски натпревари во Австралија против Мелбурн сити, Кристал Палас и Астон Вила.
Спорт
Седлоски: Со една нога сме во следното коло, но ќе бидеме внимателни и во Гибралтар

Македонскиот првак Шкупи го победи Линколн Ред Импс со 3:0 на Националната арена „Тодор Проески“. Иако има и реванш на Гибралтар, тоа е триумф што речиси гарантира пласман во следната рунда од квалификациите за ЛШ, каде чека Динамо Загреб.
Тренерот Гоце Седлоски е задоволен, вели дека тимот со една нога е во следното коло, но ќе биде максимално внимателен и на реваншот во Гибралтар.
„Честитки за фудбалерите, исполнија на теренот се што побарав од нив. Со една нога сме во следното коло, но, сепак, не очекуваат уште 90 минути во Гибралтар. Иако игравме повеќе од половина час со играч помалку, одигравме добро и можевме да постигнеме уште некој гол. Верувам дека можеме уште подобро“, изјави Гоце Седлоски.
Спорт
Шкупи со рутинска победа над Линколн на стартот на квалификациите за ЛШ

Македонскиот шампион, Шкупи стигна до рутинска 3:0 победа над аутсајдерот Линколн од Гибралтар во квалификациите за пласман во Лигата на шампионите.
Мамаду Данфа го отвори резултатот на „Тоше Проески“ уште во 11. минута, пред Сандеј Адетунџи во 29. минута да го удвои водството на тимот на Гоце Седлоски. И покрај тоа што Шкупи остана со играч помалку по вториот жолт картон на Гаги Маргвелашвили во 54. минута од мечот, во 62. минута, го зголемија водството по автоголот на Рој Чиполина.
Следен противник на Шкупи по двобојот со Линколн, треба да биде хрватскиот гигант и редовен учесник на европските натпреварувања, Динамо Загреб.
ЛИГА НА ШАМПИОНИ, КВАЛИФИКАЦИИ
ШКУПИ (МКД) – Линколн (Гиб) 3:0
Пјуник (Ерм) – ЦФР Клуж (Ром) 0:0
Малме (Шве) – Викингур Рејкјавик (Исл) 3:2
Лудогорец (Буг) – Сутјеска (ЦГо) 2:0
Балкани (Кос) – Жалгирис (Лит) 1:1
Лех Познањ (Пол) – Карабаг (Азе) 1:0
ТНС (Вел) – Линфилд (СИр) 1:0
Шамрок роверс (Ирс) – Хибернијанс Паола (Мал) 3:0