Навивачите на Челси имаа огромни очекувања на стартот на сезоната, откако Роман Абрамович потроши над 250 милиони евра носејќи ги талентираните Тимо Вернер, Каи Хаверц, ветеранот Тијаго Силва, дефанзивниот ас Бен Чилвел, а на клупата го имаа легендарниот Френк Лампард, икона на клубот. И работите тргнаа наопаку…

Во јануари, Абрамович, според многумина брутално, реши да го отпушти Лампард, и да го донесе Томас Тухел, „свеж“ по отказот од Пари Сен-Жермен. Имаше многу сомнежи, но за нешто повеќе од четири месеци, Германецот успеа да ги надитри сите и да создаде тим, кој во Истанбул ќе се бори за трофеј од Лигата на шампионите.

Тухел, со силен тим зад себе, успеа да ги надмудри речиси сите врвни тренери во фудбалот – Жозе Мурињо, Диего Симеоне (двапати), Јирген Клоп, Карло Анчелоти, Пеп Гвардиола (во ФА купот) и денеска на крај, Зинедин Зидан!  Тој има едноставна логика.

„Ако не е возможно да го играте најубавиот меч, тогаш треба да не дозволите противникот да го одигра својот најдобар меч. Тоа се пефроманси. Имаме некоја врска во тимот, вклучени сме во секој натпревар, подготвени да работиме заедно, да страдаме заедно. Најважна е посветноста и правењето на тоа што во моментот е најпотребно. Дали можам да му помогнам на соиграчот кога оди на старт? Дали ја играм мојата улога? Дали одбраната може да смета на средниот ред? Дали средниот ред може да смета на напаѓалите? Мора сите одговори да се ДА“, вели Тухел.

Статистиката е фантастична – во 24 меча има 16 победи, 18 меча без примен гол, само 2 порази, финале на Лигата на шампионите, финале на ФА купот (против Лестер) и пласман во топ 4.

Челси по третпат во својата историја влезе во финалето на Лигата на шампионите, откако неверојатниот „џокер“ Тимо Вернер беше доволен за 2:0 победа над Реал Мадрид и закажување на англиска пресметка против Манчестер сити во Истанбул на 29 мај во битка за најголемиот европски трофеј.

За „сините“ од Лондон, ова е прво финале од 2012 година, кога ги победија Баерн Минхен на пенали по 1:1 ремито, и трето вкупно, откако во 2008 година загубија од Манчестер јунајтед во епско финале, кое исто така заврши на пенали. Исто така, ова е неверојатно остварување за новиот германски тренер на клубот, Томас Тухел, кој беше донесен како замена за Френк Лампард со намера да се спаси сезоната по лошата низа, а наместо тоа речиси сигурно обезбеди топ 4 пласман во Премиер лигата, како и огромно финале.

По 1:1 ремито во Мадрид, Челси ја имаше предноста решавачкиот меч да биде на домашен терен, и тоа против Реал Мадрид предводен од Зинедин Зидан, еден од најуспешните тренери во историјата на натпреварувањата. Со нивниот поранешен фудбалер, Еден Азар како стартер, Челси во првото полувреме мораше да се соочи со расположениот Карим Бензема, кој имаше две шанси кои ги одбрани Едуар Менди, а од друга страна, Тимо Вернер, кој беше толку критикуван во последните неколку месеци по големите утки, прво даде гол во 18. минута кој му беше поништен, за потоа во 38. минута по одличната акција на Каи Хаверц кој ја погоди пречката, да не утне од минимална далечина за 1:0.

„Кралевите“ се обидоа да ја поништат негативата, и им беше потребен само еден гол да примораат продолжувања, но наместо тоа во 85. минута, Мејсон Маунт стави точка на натпреварот за огромна победа.

За „кралевите“, сега останува трката во домашниот шампионат, каде што заостануваат зад лидерот Атлетико Мадрид, а во игра се и Барселона.

ЛИГА НА ШАМПИОНИ, ПОЛУФИНАЛЕ, 2.МЕЧ

Челси – Реал Мадрид 2:0, прв меч 1:1, вкупно 3:1

Манчестер сити – Пари Сен-Жермен 2:0, прв меч 2:1, вкупно 4:1



УЕФА е подготвена да им даде сурови казни на клубовите кои уште не се откажале од проектот на Суперлигата, тврди „ЕСПН“, објаснувајќи дека се подготвува двегодишна суспензија од европските натпреварувања.

УЕФА во последните 10 дена разговара со 12-те клубови кои ја формираа Суперлигата (Манчестер јунајтед, Манчестер сити, Арсенал, Тотенхем, Челси, Ливерпул, Реал Мадрид, Атлетико Мадрид, Барселона, Интер, Јувентус и Милан) во обид да се договори помала казна за тие кои се откажаа, но со формална декларација за целосно откажување од проектот. Според „ЕСПН“, сите клубови се договорени, освен Интер, кои се блиску до договор, додека Јувентус, Реал Мадрид, Барселона и Милан засега остануваат на своите позиции.

УЕФА ќе се повика на 51 член од нивниот статус во кој се вели дека „не може да се формираат комбинации и алијанси меѓу клубови без дозвола на УЕФА“. Четирите клуба веруваат дека имаат легална подлога бидејќи првичните документи на Суперлигата побараа дозвола од УЕФА и ФИФА за натпреварувањето. Дополнителен проблем на УЕФА е одлуката на трговскиот суд во Мадрид за „замрзнување“ на било кои казни додека случајот не се реши на суд.

Сепак, надежта на УЕФА е тоа што ако 9 клуба од 12-те формално се откажат од Суперлигата, според нивниот статус, проектот се поништува, бидејќи не сака да влезе во легална битка која може да ја загуби.