Петочното дерби на лидерот во Италија, Интер и на четвртопласираниот тим, Рома, разочара, откако двата клуба пропуштија многу шанси за мечот на „Сан Сиро“ да заврши 0:0 и „нераѕурите“ да дозволат Јувентус со победа над Лацио да се врати на првото место во Серија А.

Со овој резутат, уште еднаш се потврдува дека „волчицата“ е тежок противник на гостувањата кај Интер – тие немаат пораз од 2015 година, а во последните 14 гостувања на „Меаца“ имаат дури шест победи и само три порази.

Рома доминираше во поседот на топката, посебно во првото полувреме, но сепак, поизгледните шанси беа кај Интер, кои пропуштија неколку „подароци“ од одбраната на Рома во првото полувреме.

Интер е прв со 38 поени, два повеќе од Јувентус, додека Рома останува четврта со 29 поени, еден помалку од третопласираниот Лацио.

Јирген Клинсман беше донесен како тренер на Херта Берлин во обид да ги „сврти“ работите за клубот од германската престолнина, но ќе почека за првата победа, откако тие успеаја да пропуштат 0:2 водство и одиграа само 2:2 на гостувањето кај Ајнтрахт Франкфурт.

Доди Лукебакио ја донесе „старата дама“ во водство во 30-тата минута, пред Марко Грујиќ да им донесе 0:2 водство во 63. минута.

Меѓутоа, Мартин Хинтерегер само две минути подоцна успеа да намали на 1:2, пред Себастијан Роде во 86. минута да го комплетира пресвртот и да ја прекине лошата низа од три порази едноподруго на „орлите“.

Херта уште е во зоната за испаѓање на 18. место со 12 поени, додека Ајнтрахт се 10-ти со 18 поени.

Поранешниот тренер на Милан и Јувентус, Масимилијано Алегри вели дека е „воодушевен“ што повторно се практикува фудбалска игра со контранапади, бидејќи се направило грешка со следењето на стратегијата на Пеп Гвардиола со „тики-така“ игра на посед на топката.

Од 2008 до 2012, Гвардиола беше на чело на еден од најдоминантните тимови на светот, Барселона со Лионел Меси, Андреас Иниеста и Чави во врвот на своите способности, освојувајќи 14 трофеи и рушејќи низа рекорди. По ова Гвардиола беше прогласен за „визионер“ со стилот на игра, кој го примени и во Баерн Минхен и во Манчестер сити, но Алегри вели дека „тики-така“ не е за секого коментирајќи го „проактивниот“ стил на игра на легендарниот поранешен тренер на Милан, Ариго Саки.

„Сега, конечно, гледам враќање на контранападот на голема врата. Згрешивме што го следевме Гвардиола последните 20 години бидејќи тој фудбал не беше за секого. Мораш да го имаш Иниеста, Чави и Меси, и таа лекција погрешно ја научивме. Кога ќе го слушнам Саки како зборува за заддржувањето на топката и проактивен пристап, не сфаќам што зборува и тоа ме нервира. Зошто вертикалната игра не би била проактивна. Ги гледав мечевите на Саки по 20 пати. Се сеќавам на ’Сан Сиро’ еднаш Милан постигна пет гола против Реал. Играа директно, и тоа беше вертикален Милан, со контранапади, што воопшто не е лесно, но кога ќе успееш е вистински спектакл“, вели 52-годишниот Алегри во интервју за „Кориере дело спорт“.

Според италијанскиот стручњак, потребни се постојани иновации во тактиката и филозофијата.

„Денеска кога патувам, гледам како играат младите и аматерите и зборувам со тренерите и слушам работи кои ме плашат. Тие зборуваат како да читаат од учебник, како од телевизија. Ако филозофијата е добра, зошто да не се користи бидејќи нели резултатот е најважен. Дали стигнуваат до резултати? Роберто Манчини, италијанскиот селектор, е поинаков. Тој игра едноставно, тој е маестро“, додава Алегри.