Вест хем на Дејвид Мојс успеа да се искачи на петтото место на табелата во Премиер лигата, откако во еден драматичен меч ги победија Астон вила со 2:1, бидејќи гостите прво утнаа пенал за израмнување, а потоа им беше поништен гол во 92. минута поради офсајд.

Анџело Огбона уште во втората минута ги донесе „чеканите“ во водство, но на полувреме се отиде со нерешен резултат, откако во 25. минута, Џек Грилиш постигна прекрасен гол, уште еднаш покажувајќи дека ја игра најдобрата сезона во кариерата.

По помалку од 30 секунди од второто полувреме, Вест хем повторно дојдоа во водство, овојпат преку Боуен, пред гостите да имаат шанса да извлечат реми со пеналот во 74. минута, во кој Оли Воткинс ја погоди пречката. Драмата не заврши тука – во 92. минута Воткинс убаво го најде Мат Таргет кој ја смести топката зад грбот на Лукаш Фабијански, меѓутоа голот беше поништен поради офсајд.

Вест хем сега се петти со 17 поени, четири помалку од лидерите Тотенхем и Ливерпул, додека Вила  се на 10. место со 15 поени.

Џенова очигледно ја чека тешка борба за опстанок во Серија А, откако ниту влегувањето на Горан Пандев не успеа да спречи 1:2 пораз на „Грифоне“ од Парма во дербито на два тима кои имаат лош старт на сезоната.

Џокер за тимот на Фабио Ливерани беше ветеранот Жервињо, кој постигна гол во 10. и 47. минута за 0:2 водство, по што Џенова одговори преку Узбекистанецот Елдор Шомуродов во 50. минута. Пандев влезе токму на местото на Шомуродов во 69. минута, но не успее да го спречи шестиот пораз во девет меча за неговиот тим.

Со трите поени, Парма „скокна“ на 16. место со 9 поени, додека Џенова останува на претпоследното место со 5 поени, три повеќе од фенерџијата Кротоне.

Србија ја забележа втората победа во квалификациите за Евробаскетот 2022, победувајќи ја Финска со 75:66 за да дојдат на чекор до пласман на првенството.

Тимот на Игор Кокошков играше фантастично во одбраната на стартот на мечот, оставајќи ги Финците на само седум поени (17:7), за да отидат на одмор со 13 поени предност. Анѓушиќ со 19 поени беше најдобар за Србите, додека Максуни за Финците даде 15. Со 2-2 скор, на Србија и треба една победа во последните две кола од квалификациите, или пораз на Финска.

Италија, пак, во најинтересниот меч со 70:66 ја совладаа Русија за да останат совршени во квалификациите со 4-0 скор. Двата тима имаа по 15 поени во првата четвртина, пред Италијанците да се одвојат на пет поени предност, но не успеаја да направат поголема предност. Русите имаа напад при 69:66, но не го остварија. Амедео Теситори имаше 27 поени и 9 скока за „аѕурите“, додека Андреј Воронцевич уфрли 11 поени за „зборнаја“.

Во најбизарниот меч денеска, Шпанија со неверојатни 94:41 ја декласираше репрезентацијата на Романија, откако во втората четвртина им дозволија само 9 поени, а во последната 8, додека им уфрлија 36 поени.

ЕВРОБАСКЕТ 2022 КВАЛИФИКАЦИИ

Русија – Италија 66:70 (15:15, 16:21, 13:14, 22:20)

Швајцарија – Грузија 84:91 (24:27, 15:19, 15:19, 30:26)

Израел – Полска 78:72 (16:18, 25:14, 21:20, 16:20)

Украина – Австрија 70:67 (16:14, 13:16, 21:15, 20:22)

Србија – Финска 75:66 (17:7, 18:18, 20:20, 20:21)

Шпанија  – Романија 94:41 (27:12, 18:9, 13:12, 36:8)

Словенија – Унгарија, одложено