Газдата на Челси, Роман Абрамович, правел тајни инвестиции во фудбалери што не биле сопственост на неговиот клуб, покажува последната истрага на американската Мрежа за финансиска контрола (Фин ЦЕН).

Абрамович имал компанија регистрирана на Британските Девствени Острови со назив „Леистон холдингс“, која купувала удели во фудбалери преку сопственост на трето лице – процедура во која инвеститори купуваат акции во идниот трансфер на потенцијално квалитетни фудбалери од финансиски слаби клубови. Оваа практика беше забранета од Премиер лигата во 2008 година, но ФИФА ја забрани дури во 2015 година.

Ова се открива од новите обелоденети документи од Фин ЦЕН, каде што се покажува дека Перуанецот Андре Карилјо, кој играше против Челси во меч од ЛШ во 2014 за Спортинг Лисабон, бил фудбалер во сопственост на Абрамович.

Според документите, во декември 2016 било забележана сомнителна активност во врска со сметките на Абрамович со исплата преку офшор-компании од речиси милијарда долари. Парите кружеле околу неколку компании, а деветпати било исплатено на компанија од Кипар, средства што подоцна биле расцепкани на четири компании и од кои 156 милиони долари влегле во „Леистон холдингс“. „Леистон“ исто така била вклучена во уште двајца фудбалери на Спортинг – Гаел Еток (кој играше од 2012 до 2013) и Валентим Виола (од 2012 до 2016).

Портпаролот на Абрамович не ги демантира информациите, но посочува дека немало криминални активности бидејќи во тој период таква сопственост била дозволена.

„Фактот што трансакциите биле доверливи не значи дека биле незаконски или дека прекршувале некакви закони. Тоа се случувало пред ФИФА да ги промени своите правила“, вели портпаролот на Абрамович.

Роман Абрамович има богаство од 12,9 милијарди долари (според магазинот „Форбс“), пари што ги заработи во трговија со нафта и гас кога претходно бил сопственик на компанија за производство на кукли. Тој беше гувернер на областа Чукотка во Русија пред да го купи Челси во 2003 година. Во 2018 година Велика Британија не му ја продолжи „инвеститорската“ виза и оттогаш тој живее во Израел.

Ова лето, во период на економска криза на фудбалските клубови поради коронавирусот, Челси потроши над 200 милиони фунти на засилувања.

Новак Ѓоковиќ ја освои својата 36. титула АТП-мастерс 1.000 по 7:5/6:3 победата над Аргентинецот Диего Шварцман во финалето на Италија опен за да го помине Рафаел Надал по бројот на трофеи од турнирите што се од вториот ранг на натпреварувањата, веднаш зад гренд слем трофеите.

Ова исто така е петта титула на Србинот во Рим и 81. трофеј во блескавата кариера, а во исто време го победи Шварцман петти пат во петте меѓусебни дуели, иако Аргентинецот не беше лесен противник, што го покажа со елиминацијата на Рафаел Надал во четврт-финалето.

Шварцман почна фантастично со два брејка на сервис на Ѓоковиќ и водство од 3:0, но потоа следуваше камбек на Србинот за 5:4 водство. Аргентинецот спаси една сет-топка, но потоа Ѓоковиќ стигна до 7:5 во првиот сет. И вториот сет Ѓоковиќ го почна со загубен брејк, но веднаш му одговори на противникот за на крајот по еден час и 54 минути игра да го освои трофејот.

Ова е совршена подготовка за Ѓоковиќ за „Ролан Гарос“ по дисквалификацијата од САД опен и контроверзиите што следуваа потоа и иако неколкупати повторно ја покажа нервозата во својата игра, на крајот ментално ги надмина сите проблеми. Србинот има 31-1 скор во 2020 со дисквалификацијата во Њујорк, која му се води како единствен пораз.

DJOKO-VICTORIOUS 🏆

The moment @DjokerNole won his 5th Rome crown – and a record-breaking 36th Masters 1000 title! #IBI20 pic.twitter.com/IHrXJVxKl5

— Tennis TV (@TennisTV) September 21, 2020

РК Вардар реагира на одлуката на ЕХФ да се одложи мечот од Лигата на шампионите против норвешкиот Елверум, кој требаше да се игра во Скопје на 24 септември.

Причина за одложувањето се рестрикциите од страна на Норвешка поврзани со патувањето на тимот на Елверум во Скопје и потоа задолжителното задржување во карантин по враќањето.

„Не можеме да влијаеме на одлуките на норвешките власти, но треба да забележиме дека секоја влада обезбедува исклучок за спортските тимови. Ние сме на позиција дека Вардар 1961 не бил еднакво третиран бидејќи ги направивме сите потребни активности за организација на натпреварот вклучувајќи ги сите стандарди за здравствена безбедност во согласност со упатствата на ЕХФ и на локалната самоуправа, како и изолираната резервација на хотелот само за луѓето од Елверум.

Одложувањето на натпреварот ќе му донесе повеќе проблеми на Вардар 1961 бидејќи сме пред почеток на СЕХА-лигата и ќе се соочиме со проблеми во календарот и со натпреварот со Елеверум. Од друга страна, Елверум имаше опција да го одложи својот натпревар во домашното првенство.

Ние би сакале, доколку е можно, одлуката за одложување да се ревидира и натпреварот да се игра според предвиденото“, велат од Вардар.

Фото: РК Вардар