Капитенот на Динамо Загреб и македонски репрезентативец Аријан Адеми се решил да не прави трансфер во клубот од Обединетите Арапски Емирати, Ал-Наср за да остане во хрватскиот шампион.

Хрватските медиуми претходно јавија дека го делат само часови од потпис за Ал-Наср од Дубаи, каде што тренер е Крунослав Јурчиќ, човекот кој го донесе во Динамо од Шибеник пред десет години, но сега тврдат дека тој решил да остане во клубот кој беше со него во тешките моменти по суспензијата по позитивниот допинг-тест.

Динамо претходно ја одби понудата од 2.5 милиони евра на Реал Бетис, а арапската понуда била повеќекратно поголема.

Канаѓанката Лоренс Винсент Лапоинт го доби случајот пред Интернационалната кану федерација (ИЦФ) во кој тврдеше дека нејзиниот позитивен тест е резултат на „контаминација“ од телесните течности од нејзиното момче.

11-кратната светска шампионка Лапоинт имала позитивен тест на лигандрол, еден вид на стероид во јули и ја очекуваше четиригодишна суспензија. Но, нејзиниот адвокат успеа преку анализа на влакно од косата на сега веќе поранешното момче да докаже дека тој е виновен за малото ниво на лигандрол во нејзиниот систем.

Овој случај наликува на тој од 2009 година, кога францускиот тенисер Ришар Гаске беше ослободен по позитивниот тест на кокаин, откако тврдеше дека бакнал жена во ноќен клуб во Мајами која претходно земала кокаин.

27-годишната Лапоинт го пропушти Светското првенство во 2019 година, но уште може да се квалификува за Олимпијадата во Токио.

Ајнтрахт Франкфурт постхумно му го одзеде почесното претседателство на Рудолф Грамлих откако истрагата покажа дека тој имал врски со нацистите.

Грамлих беше претседател на Франкфурт од 1955 до 1970 година, во периодот кога е освоена единствената германска титула во 1959 година. Независната истрага потврди дека тој имал врски со злогласните СС („Ес-Ес“) пред да пристигне во клубот. Одлуката, која ја донесе почесниот совет на тимот беше пречекана со аплауз.

„Без разлика на тоа што постигнал почесниот претседател на спортско поле, тој мора да биде и етички и морален пример за сите“, изјави сегашниот претседател на клубот, Петер Фишер.

Грамлих бил фудбалер на Франкфурт од 1929 до 1944 година, германски репрезентативец во 1930-тите и капитен на тимот на Олимпијадата во Берлин во 1936 година. Според независниот извештај тој профитирал од нацистичкиот режим како бизнисмен, а бил и член на дивизијата „мртовечка глава“ на „Ес-Ес“.