Ла лига нема да биде единствената европска лига која ќе има мечеви секој ден по рестартот на шампионатот, откако и Серија А планира по 20 јуни да има меч секој ден во седум различни термини.

Според „Кориере дело спорт“, планот за „ширење“ на натпреварувањата е направен за да се осигура приходот од пеј-пер-вју телевизиските канали и во исто време да се задоволат клубовите. Планот е да се комплетира шампионатот до 2 август.

Единствена пречка ќе бидат можните попладневни натпревари, откако Асоцијацијата на фудбалери (АИЦ) постојано одбива можност за играње попладне на италијанското сонце во јули.

Се верува дека распоредот е следен – во понеделник ќе има меч во 21.00 часот, во вторник, среда и четврток да има мечеви во 19 и 21 часот, петокот ќе има еден меч од 21 часот, додека саботите и неделите ќе бидат „раширени“ со стартно време од 17.15, 19.30 и 21.45.

Шпанскиот спортски весник „Марка“, познат по својата блискост со Реал Мадрид, тврди дека ќе се случи „невозможното“ – „кралскиот клуб“ ќе остане без засилување во летниот преоден рок.

Тоа што изгледаше како нешто неверојатно, сега можеби ќе се оствари поради финансиските рестрикции на клубовите поставени од Ла лига, и секако паричните проблеми поради корона вирусот. Како и повеќето големи клубови, „кралевите“ загубија огромен приход од билетите, од посетите на нивниот музеј, но во клубот се надеваат дека со намалувањето на платите на директорите и фудбалерите ќе се преброди кризата.

Во Мадрид очекуваат следната сезона да загубат околу 150 милиони евра од играње без публика, така што сите планови за големи засилувања засега се ставени на „пауза“, а тие фудбалери за кои беа посебно „загреани“ биле информирани дека ќе треба да почекаат.

Ерлинг Халанд и Едуардо Камавинга се две имиња кои најчесто се споменуваа последните месеци, но не и единствените, тука е желбата да се донесе Пол Погба, па и Нејмар.

Заедно со фудбалерите во Б-тимот на Кастилја, и тие кои се пратени на позајмица, Реал Мадрид може да ја стартува 2020/21 со 40-тина фудбалери и главен проблем ќе биде како да се ослободат од дел од поискусните фудбалери кои би ги пратиле на позајмица. Хамес Родригез има превисока плата за да биде пратен на позајмица, додека Герет Бејл не размислува за трансфер, како што најави неговиот агент – тој планира да го исполни договорот со клубот.

Премиер лигата потврди дека нема нови позитивни тестови на корона вирусот во лигата, што заедно со одлуката на британската влада дека од 1 јуни може да се оддржуваат спортски натпреварувања без гледачи, носи позитивна атмосфера пред враќањето на лигата.

Четвртиот сет на КОВИД-19 беа направени на 1.130 фудбалери и членови на клубовите на 28 и 29 мај, и ниту еден од нив не бил позитивен.

„Премиер лигата ги објавува овие податоци за да се зачува интегритетот и транспарентноста на нашето натпреварување. Нема да се даваат одредени детали за клубовите или индивидуалците“, се вели во објавата на Премиер лигата.

Во првиот сет тестирања имаше шест позитивни случаи од три клуба, во вториот сет имаше двајца позитивни во два клуба, а во третиот и четвртиот немаше ниту еден.

Планот на Премиер лигата е да се вратат на натпреварувањето на 17 јуни, но уште не е утврдено дали ќе се игра на неутрални стадиони.