Германскиот кошаркар Јошико Саибу доби отказ од неговиот клуб Баскетс Бон во вторникот откако минатиот викенд во Берлин бил дел од протестите против владините мерки за борба со коронавирусот.

„Не можеме да бидеме одговорни за постојаниот ризик од инфекции, каков што во моментов претставува кошаркарот Саибу. Тој доби отказ поради прекршувањата на договорот“, вели генералниот менаџер на тимот кој беше 15. во Бундеслигата, Волфганг Видлих.

Германија има 211.000 случаи од Ковид-19 и 9.156 смртни случаи, но во последно време бројот на инфекции е на највисоко ниво од мај.

30-годишниот Саибу бил дел од демонстрациите против мерките за коронавирусот во центарот на Берлин во саботата, каде што беа присутни околу 20.000 протестанти. Полицијата го „растури“ собирот попладнето бидејќи демонстрантите не носеа маски.

Поранешната најдобра британска тенисерка, Анабел Крофт го нападна Ник Кирјос за неговите „неверојатно непристојни и безмилосни“ коментари кон своите ривали кои според неа ги прави само да добие внимание.

Кирјос последните месеци влезе во остар напад на Новак Ѓоковиќ и неговата „Адрија турнеја“ на која се заразија со корона вирус повеќе тенисери, вклучувајќи го Ѓоковиќ, Григор Димитров, Борна Чориќ и Виктор Троицки, како и Горан Иванишевиќ. Подоцна, вчера кога се повлекуваше од САД опен на Флешинг Медоуз не пропуши да ги критикува „тие кои танцуваат на маси“.

Крофт вели дека таа не е голем фан на Кирјос, како и многу тениски љубители.

„Тој се поставува на позиција на морална супериорност и постојано е многу гласен, и според мене неверојатно непристоен и безмилосен кон своите соиграчи во последно време. Ги напаѓа Ѓоковиќ, Доминик Тим, неодамна го нарече Борна Чориќ човек со мозок како киритка и најдосадниот тенисер во историјата. Тоа го прави само за да добие внимание и самиот се промовираше во злосторник. Морам да кажам дека со ова однесување, не го почитувам најмногу. Не можам да го почитувам како човек и тешко е да се слушаат неговите изјави“, вели Крофт.

Организаторите на мастерсот во Мадрид потврдија дека турнирот кој требаше да се оддржи од 12 до 20 септември е откажан поради зголемениот број на случаи на Ковид-19 во шпанската престолнина.

„Како најодговорен потег во сегашната ситуација и по разгледување на сите опции, одлучивме турнирот да не се оддржи оваа година“, објавија организаторите.

АТП и ВТА-турнирот требаше да биде главна подготовка за Ролан Гарос, кој стартува на 27 септември. Шпанија е една од најпогодените европски земји од коронавирусот имаше над 315.000 случаи и 28.400 смртни случаи од вирусот.