Спорт
Фиорентина со 10 официјални предлози контра безмилосните фудбалски агенти

Претседателот на Фиорентина, Роко Комисо, објави список од 10 предлози за правење пооддржлив систем во фудбалот откако и во минатото бараше потранспарентни правила во Серија А, но и разјаснување на односите меѓу клубовите и агентите.
Оваа декларација доаѓа во момент кога повеќе италијански клубови се под истрага за лажно пријавување капитален профит преку продажба на играчи, а под истрага е и славниот агент со потекло од Тетово, Фаљи Рамадани.
„АЦФ Фиорентина подолго време верува дека се потребни граници за баланс за сите вклучени во фудбалот. Според ФИФА, во последната деценија агентите што ги претставуваат фудбалерите и тренерите заработија 3,1 милијарди евра од трансфери на играчи. Само во 2019, од 7 милијарди евра на трансфери, 700 милиони отидоа кај агентите. Во ‘затворените’ професионални спортски лиги во САД, како МЛС, НФЛ, МЛБ, НБА и НХЛ, агентите немаат толку големо влијание и се регулирани од комесари, а во фудбалот нема регулативи, ниту транспарентност“, се вели во објавата на Фиорентина.
Ова се нивните 10 предлози:
1. Ограничување на процентот за трансфери – парите за агентите не смее да надминуваат 5 отсто од вредноста на фудбалерот;
2. Само една сума – агентите треба да земаат пари само од една од страните, пожелно од клубот што купува;
3. Индивидуално претставување – во секој трансфер агентите треба да го претставуваат само фудбалерот;
4. Солидарен систем за слободни трансфери за да се заштитат клубовите, кои и покрај тоа што постојано инвестираат во развојот на фудбалерите, некои од нив си заминуваат пред крајот на договорите бесплатно;
5. Преговори само меѓу клубовите – додека фудбалероте е под договор, само клубот што продава може да ја одредува цената со клубот што купува;
6. Подолги договори – потребни се подолги договори со фудбалерите (пожелно 5+1 година), како во Премиер лигата;
7. Ограничување на парите за агентите – тие не смее да земаат повеќе од 3 отсто од вредноста на договорот на фудбалерот;
8. Други извори за заработка на агентите – агентите ќе може да добијат дополнителни пари за другите договори на фудбалерите (интелектуални права, медиумски права, спонзорство), но само ако тоа не го нарушува договорот на клубот со фудбалерот:
9. Сметководство – да се води сметка за сите исплати на агентите;
10. Постојана транспарентост – сите суми исплатени на агентите од клубовите треба јавно да се декларираат кај ФИФА и УЕФА и кај даночните служби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Мухова спаси меч-топка, па ја доби „војната“ со Сабаленка за прво гренд слем финале

Чехинката Каролина Мухова се пласираше во своето прво гренд слем финале, откако во луда битка од 3 часа и 17 минути, ја изненади втората носителка и шампионка од Австралија опен, Белорусинката Арина Сабаленка со 7:6(5)/6:7(5)/7:5. Во големото финале на Ролан Гарос, таа ќе се судри или со актуелната шампионка и светска тенисерка број 1, Полјачката Ига Швјонтек или со бразилското изненадување, Беатриз Хадад Маја.
Во неверојатно израмнет меч, со многу пресврти, но и многу неизнудени грешки, Сабаленка беше на чекор од победата, кога поведе со 5:2 во третиот сет, и дури дојде до меч-топка. Но, Мухова успеа да се спаси, да направи два брејка, и да се пласира во финалето, нејзин најголем успех на гренд слем турнирите.
26-годишната Мухова во моментов е на 43. место на ВТА листата и во својата кариера има само една титула, Кореја опен во 2019 година, по што повеќе пати паузираше од тенисот поарди низа повреди.
Спорт
Пелистер го задржува Кисум и следната сезона

РК Еурофарм Пелистер потврди дека данскиот интернационалец Каспер Кисум го продолжил договорот на уште една сезона, продолжувајќи го престојот во шампионска Битола.
30-годишниот Кисум пристигна во Пелистер на почетокот на годината и беше еден од клучните играчи за Пелистер во борбата за титулата, и сега ќе биде дел од тимот кој ќе игра во Лигата на шампиони.
Фото: СЕХА лига
Спорт
Милевски задоволен од првите подготовки за мечевите со Украина и Англија

Селекторот на македонската фудбалска репрезентација вели дека е задоволен од прелиминарните подготовки за двата меча од квалификациите за ЕУРО 2024 против Украина (на 16 јуни во Скопје) и Англија (на 19 јуни во Манчестер), и покрај тоа што тренинзите беа направени во нецелосен состав.
Дени Илиев, Езѓан Алиоски, Јован Манев, Енис Барди, Аријан Адеми и Илија Несторовски поради обврски во клубовите не беа во можност да се стават на располагање за подготовките од 2 до 8 јуни на тренинг центарот „Петар Милошевски“, додека Елиф Елмас денеска одработи тренинг со своите репрезентативни колеги.
„Повеќето од фудбалерите се собраа, очекуваме и останатите да ни се придружат во следните три дена, на 12. јуни треба да бидеме комплетни на тренинг откако ќе пристигнат Алиоски, Адеми и Илиев. Исклучително сум задоволен од оваа фаза на подготовки. Фудалерите, иако уморни од сезоната во клубовите, покажаа ангажираност, професионален пристап и голем ентузијазам.
Се обидовме да постигнеме одреден баланс со однос на физичката исцрпеност и енергијата која ќе ни треба за следната фаза подготовки и натпреварите кои не очекуваат. Акцентот сега го ставивме на физичката подготвеност, а веќе од 10. јуни се насочуваме на техничко-тактичка анализа и тоа ќе биде фокусот на тренинзите.
Украинците ќе ги предводи нов селектор, кој ќе го промени системот на игра, но ние веќе навикнавме на промени кои во најмала рака ни ја отежнуваат работата во однос на подготовка на натпреварите. Таков беше случајот и пред мечот со Малта.
Но, за нас е најважно да бидеме силни на тренинзите кои ни следуваат и целосно да се вложиме и тактички и физички. Иако е крај од сезоната, сигурен сум дека фудбалерите имаат мотив и енергија за уште два силни натпревари“, вели Милевски.
Фото: ФФМ