Спорт
Фоњини: На Ѓоковиќ му „врие крвта“ што Надал има 21 гренд слем титула
На Новак Ѓоковиќ му „врие крвта во вените“ откако го виде Рафаел Надал како стигна до 21. гренд слем титула пред него со трофејот од Австралија опен, тврди италијанскиот тенисер Фабио Фоњини.
Пред новата сезона, српскиот светски број 1 беше апсолутен фаворит на Австралија опен, каде што имаше освоено девет титули, но во драмата на почетокот на годината, властите му ја поништија визата, и не помогна долгиот легален обид на Србинот да настапи на турнирот и тој беше депортиран. Од друга страна Надал беше аутсајдер бидејќи имаше серија повреди и долга пауза, но на крајот тој го совлада Данил Медведев по повеќе од пет часа тенис за историски успех.
Уште полошо за Ѓоковиќ, следниот гренд слем е Ролан Гарос, каде што Надал секако ќе биде фаворит за титулата. Фоњини вели дека Србинот е бесен.
„Бидејќи го познавам, мислам дека му врие крвта во вените. Од една страна, сигурно е среќен, бидејќи има предизвик пред него и тоа ќе го мотивира. Сигурно си помислил: ‘Супер што победи, ќе се видиме во Париз’. Новак е многу конкурентен човек и го покажа тоа во годините. Но, кој вели дека Рафа нема да стигне до бројот 22 во Париз?“, вели Фоњини во интервју за „Ла газета дело спорт“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.