Капитенот на Реал Мадрид, Карим Бензема, не сакаше да ја коментира одлуката на Килијан Мбапе да остане во ПСЖ, односно да не му се придружи на „Сантијаго Бернабеу“. Поточно, ја означи како небитна во овој момент, кога е максимално фокусиран кон финалето во Лигата на шампионите.

„Мбапе? В сабота играме финале во Лигата на шампионите. Сега не е време да размислувам и да разговораме за небитни работи. Не сум лут, туку сум фокусиран на Лигата на шампионите, тоа е многу поважно. Инаку, секој одлучува за себе, а јас сега размислувам единствено за финалето“, изјави Бензема.

Французинот додаде дека и фотографијата со „Тупак“ на неговиот Инстаграм не била наменета за Мбапе, иако означува „предавство“.

Новиот италијански првак Милан нема да дозволи да се раздели со Рафаел Леао, офанзивецот кој се претвори во херој на „росонерите“ и постигна многу важни голови во трката до „скудетото“. За него се интересираат Пари Сен Жермен и Реал Мадрид, а раководството на Милан ќе бара отштета од 150 милиони евра за негов евентуален трансфер.

Рафаел Леао има договор до јуни 2024 година, а на 34 натпревари оваа сезона постигна 11 гола и имаше 10 асистенции. Тој беше асистент на сите три гола за Милан во последното коло при триумфот од 0:3, по што титулата конечно се врати на „Сан Сиро“.

Италијанскиот калчолигаш Салернитана во последното коло успеа да обезбеди опстанок во Серија А, но има многу поголеми амбиции за следната сезона. Раководството на клубот посакува да го ангажира уругвајскиот напаѓач Единсон Кавани кој ја заврши својата авантура во Манчестер јунајтед.

Кавани во минатото го носеше дресот на Палермо и на Наполи во Италија, а потоа се пресели на „Паркот на принцовите“ во Париз.

Покрај Кавани како ново име, раководството на Салернитана сака да го задржи и Франк Рибери уште сезона.