Пред утрешното фудбалско „Ел класико“ на „Ноу Камп“, Барселона успеа да го совлада Реал Мадрид со 79:72 во кошаркарската пресметка во Евролигата, за да ги прати „кралевите“ на 1-4 старт на сезоната.

Барселона имаше неверојатна доминација во првото полувреме во „Палау Блауграна“, пред да го изддржи камбекот на Реал во второто полувреме. Никола Миротиќ и Виктор Клавер беа во аут, така што Кајл Кјурик беше најефикасен со 15 поени, Брендон Дејвис додаде 14 поени, а Кори Хигинс имаше 13. За гостите, Треј Томпкинс имаше 14 поени, а Алберто Абалде имаше 13, за да ја намалат предноста од 23 поени во второто полувреме на пет поени, но на крајот немаа сила за подвиг.

Со триумфот, тимот на Шарунас Јасикевичиус има 3-0 скор и 4-1 во Евролигата.

ЕВРОЛИГА, 5.КОЛО

Химки – Макаби Тел Авив 87:89 (18:16, 15:20, 22:22, 26:23, 6:8)

Баерн Минхен – Олимпијакос 74:68 (22:18, 17:16, 22:19, 13:15)

Барселона – Реал Мадрид 79:72 (18:14, 30:13, 16:25, 15:20)

Астон вила не успеа да го продолжи стоотстотниот старт на новата сезона во Премиер лигата, откако по четири победи во низа (вклучувајќи го и неверојатниот 7:2 триумф над Ливерпул), беа скротени дома од Лидс на Езѓан Алиоски (овојпат како стартер) со 0:3

Херој на тимот на Марсело Биелса беше Патрик Бемфорд, кој постигна неверојатен хет-трик за неполни 20 минути во второто полувреме за да продолжи фантастичната серија на новиот премиерлигаш, кој сега е на третото место на табелата со 10 поени, три помалку од лидерот Евертон.



Првиот меч од петтото коло на Серија А ни донесе еден неверојатен меч помеѓу Сасуоло и Торино, и тоа не поради 3:3 ремито со еден куп пресврти, туку поради густата магла која на моменти го правеше мечот невозможен за следење.

Иако беше јасно дека многу услови за фудбал нема, судијата Марко Гвида одлучи мечот да се одигра, и на крајот домаќините успеаја да останат непоразени оваа сезона во бизарен меч на „Мапеи“, а Торино на Марко Џампаоло по четири меча има само еден поен.

Карол Линети пронајде пат низ густата магла во 33. минута да донесе водство на „биковите“, а Сасуоло успеа да израмни преку Филип Ѓуричиќ во 71. минута, кога маглата покажа малку милост за фудбалерите.

Потоа следуваше лудиот пресврт – Торино успеа да поведе со 1:3 со головите на Белоти и Лукиќ за само две минути (77. и 79.), пред Сасуоло да врати со два гола исто така за две минути преку Влад Кирикес и Франческо Капуто.