Легендата на Манчестер Јунајтед – Гери Невил ја пофали работата на новиот кормилар на „црвените ѓаволи“, Ралф Рангник кој минатиот викенд за првпат беше на клупата на тимот од „Олд Трафорд“.

Невил долг период му даваше поддшка и на претходниот менаџер на Јунајтед, Оле Гунар Солскјер, но признава дека сега, Германецот донесе ред на клупата на тимот од Манчестер.

Прва победа без примен гол на домашен терен по 15 натпревари, против Кристал Палас во Премиерлигата.

„Навистина уживав во натпреварот. Првите 30 минути на мечот беа апсолутно фантастични. Во преостанатиот еден час ја завршивме работата. По мечот размислував како беа добри првите 30 минути, тоа е она што сакаме да го видиме од Рангник и од Манчестер Јунајтед. Тоа е она што фановите на Јунајтед сакаат да го видат“ вели Невил.

Поранешниот дефанзивец од ерата на сер Алекс Фергусон вели дека во последниот период многу се зборуваше за хаосот во одбраната на Јунајтед, но Рангник за кратко време успеа да го реши тој проблем.

„Поминавме 6 или 7 недели зборувајќи за нередот во одбраната. Немаа меч без примен гол во 16 наврати, примаа голови за кои не можеш да поверуваш, дома Сити и Ливерпул не разбија, но и Лестер, Вила и Вилјареал, не кршеа во контранапад. Рангник сака ред. Ред во изведбата. Мислам дека тоа го добивме“ заклучува Невил.

Извршиот директор на фудбалскиот клуб Милан – Иван Газидис вели дека изградбата на нов стадион е клучна за успешна иднина на клубот од Милано.

Проектот за изградба на новиот стадион го сподели со навивачите, а Газидис смета дека „изградбата на нов стадион е нужна за најсилната екипа во Италија“.

Поранешниот сопственик на „Росонерите“ – Силвио Берлускони порано изјави дека се противи на рушењето на култниот „Сан Сиро“.

Газидис додава дека разбира оти овој стадион е посебно место, но истакнува дека е потребно да се има храброст, пренесуваат италијанските медиуми.

„Чувствата постојат и не можат да се доведат во прашање. Спомените од стадионот ќе останат засекогаш, никој не може да ги избрише, тоа е невозможно. Имаме се што ни треба – фудбал, луѓе, навивачи. Гледам блескава иднина, само треба да се има храброст. Изградбата на новиот стадион е темелен чекор ако сакаме повторно да бидеме во врвот на светскиот фудбал“ заклучи Газидис.

Инаку, „Сан Сиро“ е изграден во 1926 година, а оттогаш четирипати е реновиран.

На него своите домашни мечеви ги игра и тимот на Интер.

Фудбалерот на лондонски Челси, хрватскиот репрезентативец Матео Ковачиќ е заразен со ковид 19, потвди денеска неговиот тренер Томас Тухел.

„Беше на тренинг во понеделникот, денес дозна дека е позитивен, па сега е во изолација. Бев свесен дека тоа може да се случи затоа што има многу такви случаи во екипите и не сум среќен поради тоа. Не само како тренер, туку и како човек. Но тоа е реалноста, мораме да се прилагодиме и да ги зачуваме луѓето здрави“ изјави Тухел.

Утре „сините“ ја играат последната средба од групната фаза во ЛШ против Зенит, но од порано го обезбедија пласманот во осминафиналето.