Спорт
Храбар пораз во Виена на десеткуваната Македонија
Македонската фудбалска репрезентација доживеа пораз од 2-1 на гостувањето во Виена, кај селекцијата на Австрија во претпоследниот меч од квалификациите за ЕУРО 2020.
Иако селекторот Ангеловски пред овој меч не можеше да смета на речиси половина стартна постава, сепак нашиот национален состав одигра храбро и достоинствено, а во финишот од мечот и со почесен погодок во противничката мрежа.
Австрија тргна офанзивно уште од првите минути, а веќе во 7 минута по една неуспешна офсајт стапуца, домаќините преку Давид Алаба дојдоа во водство од 1-0. Австријците имаа повеќе од играта во првиот дел, а пред голот на Столе Димитриевски најголемата опасност доаѓаше од Арнаутовиќ. Сепак нашиот голман беше на висината на задачата и спречи зголемување на водсвото на Австрија.
Нашите фудбалери во првиот дел беа во подредена улога, средината на теренот не функционираше најдобро, што отвораше можноста за домаќините да се закануваат кон нашиот гол. Сепак на полувреме се отиде со резултат 1-0.
Поради повреда, во првиот дел Ангеловски беше принуден да направи замена. Играта ја напушти Александар Трајковски, а на негово место влезе Влатко Стојановски.
Почетокот на второто полувреме беше како реприза на воведот на мечот. Македонските дефанзивци лошо реагираа по еден корнер, па Стефан Лаине уште на стартот на полувремето по една мешаница во шеснаесетникот погоди на 2-0.
Првата конкретна закана кон австрискиот гол ја имаше Енис Барди, директно од корнер. Малку недостасуваше да се изненади противничкиот голман.
Влатко Стојановски имаше неколку убави шанси во средината на вториот дел да постигне гол, но останаа нерализирани.
Она што претходно не му успеа, напаѓачот на француски Ним го реализираше во својата трета шанса во 90 минута за конечни 2-1.
Македонија во последното коло од ове квалификации игра уште против Израел во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Инзаги по освојувањето на титулата: Неверојатно чувство, момците се исклучителни
Со победата од 2:1 над градскиот ривал Милан, фудбалерите на Интер синоќа ја освоија 20. титула во италијанската Серија А и ја сошија втората ѕвезда над грбот на својот клуб.
Интер ја круниса доминантна сезона во Италија и на пет кола до крајот има 17 бода повеќе од Милан.
„Нероаѕурите“ беа убедливи во текот на целата сезона, на 33 натпревари претрпеа само еден пораз, и тоа на домашен терен од Сасуоло.
Тренерот Симоне Инзаги конечно стигна до Скудетото во неговата трета сезона во Интер.
Едвај ја задржа работата на крајот од првата сезона, кога во финишот на сезоната 2021/2022. му ја предаде титулата на Милан, но минатата сезона го одведе Интер до финалето на Лигата на шампионите, а сега ја освои Серија А.
„Неверојатно е чувството, постигнавме нешто извонредно. Има многу протагонисти во овој успех. Пред се, играчите, исто така и директорите, а потоа и Стивен Жанг, за се што ни овозможи на ова патување. Моите мисли одат и кај моето семејство, сопругата и децата, родителите… Мојата мана е што понекогаш не можам да ја напуштам работата и да ја носам дома, но моето семејство е основата на сè“, рече Инзаги.
Спорт
И Аргентинец ќе суди на ЕП во Германија
Европската фудбалска федерација (УЕФА) го објави списокот на судии на кои смета за претстојното Европско првенство во Германија.
Најмногу претставници, по двајца имаат Англија, Италија, Франција и Германија. Од судиите од регионот, во Германија ќе го видиме само Славко Винчиќ од Словенија, кој ќе работи заедно со неговите помошници Томаж Кланчник и Андраж Ковачиќ.
Словенија ќе има претставници и во ВАР-собата, Нејц Кајтазовиќ (како ВАР судија), Раде Обреновиќ и Јуре Прапротник (како помошни ВАР судии или четврти судија).
Меѓу ВАР судиите ќе бидат и Ирфан Пељто и Сенад Ибришимбеговиќ од Босна и Херцеговина.
Факундо Тељо од Аргентина доби специјална покана врз основа на соработката на УЕФА и КОНМЕБОЛ.
Судии на ЕУРО:
Ентони Тејлор, Мајкл Оливер (Англија), Марко Гуида, Даниеле Орсато (Италија), Даниел Зиберт, Феликс Цвајер (Германија), Клемон Турпан, Франсоа Летексиер (Франција), Дани Макели (Холандија), Шимон Марчињак (Полска), Артур Диас (Португалија), Иштван Ковач (Романија), Иван Крузлиак (Словачка), Славко Винчиќ (Словенија), Хесус Хил Манзано (Шпанија), Глен Ниберг (Шведска), Сандро Шерер (Швајцарија) и Халил Умут Мелер (Турција) + Факундо Тељо (Аргентина).
Спорт
Коман го пропушта Евро 2024
Кингсли Коман (27), крилниот напаѓач на Баерн го повреди адукторот во 49. минута од првенствениот меч со Келн (2:0), го напушти теренот на носилки бидејќи не можеше да застане на десната нога, а се испостави дека станува збор за сериозна повреда.
Требаше да паузира неколку недели, а се испостави дека францускиот репрезентативец ќе го пропушти ЕП во Германија, дознава „Лекип“.
Магнетна резонанца утврди дека закрепнувањето ќе трае подолго од очекуваното, а од самиот почеток беше јасно дека сезоната за него е завршена, но имаше индикации дека ќе се опорави за ЕП, со оглед на тоа што селекторот на триколорите, Дидие Дешам сериозно сметаше на него.
Франција го игра воведниот натпревар против Австрија во Дизелдорф.
Инаку, Коман поради претходни повреди оваа сезона веќе пропушти 13 натпревари во сите натпреварувања, а на тоа ќе додаде уште најмалку шест, во зависност од тоа дали Баерн ќе се пласира во финалето на Лигата на шампионите.
Коман, роден во Париз, ги помина сите младински селекции на Франција, а за сениорската селекција дебитираше во 2015 година. Досега има 55 настапи со осум постигнати голови.