Атлетик Билбао е екипата која ќе игра финале во Супер Купот на Шпанија откако вечерва тимот од Баскија со 2-1 славеше против Реал Мадрид во полуфиналети и спречи нов голем судир на гигантите.

Играчот на тимот од Билбао, Раул Гарсија е најголемиот виновник што Реал Мадрид нема да ја брани титулата освоена минатата година.

На стадионот „Ла Росаледа“ во Малага Гарсија донесе водство за Атлетик во 18 минута, а 20 минути подоцна истиот играч од пенал ја дуплираше предноста.

Единствено што успеа Реал да направи на овој меч и покрај силниот притисок е да намали на 1-2 преку Бензема во 73 минута.

Во финалето на шпанскиот Супер Куп, Атлетик за противник ќе ја има Барселона.

Кошаркарите на Ефес со високи 39 разлика, 99-60 славеа против руски Химки на отворањето на 20. коло во кошаркарската Евролига. Со тоа турската екипа му го нанесе 11-тиот пораз во низа на рускиот тим, што беше и трета победа во низа за Ефес.

Во домашната екипа Сансли со 19 и Ларкин со 15 поени беа најефикасни, додека кај Химки Џордан Мики имаше 14, а Швед 13 поени.

Кошаркарите на Армани Милано славеа нагости во Берлин, кај Алба со 84-70.

Најефикасен во италијанскиот тим беше Зек Ледеј со 16 поени, додека Пантер и Датоме постигна по 14.
Кај Алба „прва виолина“ беше Ламерс со 18 поени.

Макаби во Тел Авив ја совлада Басконија со 91-82.

Отело Хантер и Елајџ Брајант со по 14 поени го водеа домашниот тим до триумф, а кај гостите од Шпанија Хенри броеше до 19, а Петерс до 18 поени.

Дербито на вториот ден од ракометниот Мундијал во Египет меѓу Франција и Норвешка им припадна на „петлите“ со 28-24. Франција со стартни бодови во групата Е и тоа против директниот конкурент за водечката позиција на табелата.

По израмнетото прво полувреме (13-13), во вториот дел избраниците на селекторот Жил заиграа на повисок степен и покрај феноменалната партија на Сагосен кој постигна 11 гола за Норвешка.

Кај победничката селекција најпрецизен беше Кентин Мае со 9 гола, а по 4 постигнаа Дешат, Нгесан и Ремили. Голманот на Франција, Пардан собра 19 одбрани.
Освен Сагосен, кај Норвешка со по 3 гола беа и Јонгдал, осносно пикерот Мирхол. Во групата Е освен Франција, 2 стартни бода има и Швајцарија која попладнево ја совлада Австрија.

На мечот меѓу Португалија и Исланд решаваа нијанси. Португалија славеше со 25-23 иако во неколку наврати имаше и +5 разлика.

Најпрецизен во португалската селекција беше Соарез со 6 гола, гол помалку имаше Портела, а со 4 погодоци мечот го заврши Гомес.

Кај Исланд во услови кога го немаше Палмарсон најпрецизен беше Елисон, со 6 гола. Во оваа група Ф, по првото коло освен Португалија, со 2 бода е и селекцијата на Алжир по денешниот триумф над Мароко.