Спорт
„Имав и други понуди, но Јувентус не се одбива“
Арон Рамзи уште пред неколку месеци го договори трансферот во Јувентус, а дури денес на јавноста и беше претставен како нов играч на најтрофејниот италијански клуб. Велшанецот во Јувентус дојде како слободен играч откако му истече договорот со Арсенал.
„Имав и други понуди, но кога разбрав дека ме бара Јувентус, не постоеше опција да ја одбијам понудата. Тоа е голем клуб, еден од најголемите во светот. Секако дека ова е голем предизвик за мене, различна земја, различна култура, ќе ми биде потребно малку време да се навикнам, но верувам дека ќе бидам успешен. Сакам да бидам дел од тимот кој ќе пишува нови страници во историјата на Јувентус“, рекол Рамзи.
Велшанецот во Јувентус ќе го носи бројот 8, кој лани беше слободен, а претходно со голем успех го носеше Клаудио Маркизио. На новинарско прашање како може да ја унапреди играта на Јувентус 28 годишниот фудбалер рекол:
„ Сакам во секој момент да имам влијание во играта, преку асистенциите, со голови…Во фудбалот најважни се победите, а моја цел е да му помогнам на тимот да победува.“
Во Јувентус Рамзи ќе соработува со Маурицио Сари кого го познава од Премиер лигата. Сари минатата сезона го предводеше Челси.
„Видов како стил на игра сака. Сари сака неговиот тим да игра фудбал, а таа филозофија мене ми одговара. Верувам дека бргу ќе се прилагодам. Можам да играм на сите позиции во средниот ред, но најдобро се чувствувам кога сум ‘бокс-ту-бокс’, кога можам да учествувам и во одбраната и во нападот“, заклучил Рамзи.
Велшанецот е шестото засилување за Јувентус ова лето, претходно во клубот пристигнаа Адријен Рабио, Мерих Демирел, Лука Пелегрини, Кристијан Ромеро (кој веднаш е испратен на позајмица во Џенова) и Џанлуиџи Буфон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.