Барселона и Баерн Минхен без проблеми ја завршија работата во заостанатите мечеви од осминафиналето на Лигата на шампионите, забележувајќи победи за да закажат пресметка во четврт-финалето на елитното европско натпреварување.

Барселона дома го пречека Наполи по гостинските 1:1 во Италија, и ги реши сите дилеми уште во првото полувреме од мечот. Клемен Ленгле уште во 10. минута со убав гол со глава го отвори резултатот, а Лео Меси уште еднаш покажа дека е „магионичар“ кога во 23. минута и покрај тоа што беше соборен на земја, успеа да стане и да зголеми на 2:0.

До крајот на полувремето, паднаа уште два гола од пенал, откако прво во 45. минута, Луис Суарез зголеми на 3:0, пред капитенот Лоренцо Инсиње, исто така од белата точка да намали на 3:1.

Во Минхен, пак, Баерн го пречека Челси, кого успеа да го победи со 3:0 на првиот меч во Лондон, и исто така ја поништи цела неизвесност во првото полувреме. Роберт Левандовски во 10. минута од пенал донесе 1:0 водство, пред Иван Перишиќ во 24. минута да зголеми на 2:0. Челси прво имаше поништен гол поради офсајд, а потоа преку Теми Абрахам во 44. минута намали на 2:1.

Корентин Толисо, само што влезе во игра во 76. минута зголеми на 3:1, пред Левандовски да го запечати триумфот во 84. минута.

ОСМИНАФИНАЛЕ, 2.МЕЧ

Барселона – Наполи 3:1, прв меч 1:1, вкупно 4:2

Баерн Минхен – Челси 4:1, прв меч 3:0, вкупно 7:1

ЧЕТВРТ-ФИНАЛЕ

РБ Лајпциг – Атлетико Мадрид

Аталанта – Пари Сен-Жермен

Манчестер сити – Лион

Барселона – Баерн Минхен



Силекс имаше среќа и ги избегна силните европски клубови во првото квалификациско коло за Лигата на шампионите пред понеделничката ждрепка во Нион.

Силекс, кој го презеде местото на Вардар во ЛШ откако „црвено-црните“ не успеаја да стигнат до лиценца, е во групата 4 меѓу „не-носителите“ и можни противници му се Астана од Казахстан, Карабаг од Азербејџан, Макаби Тел-Авив од Израел и Динамо Тбилиси од Грузија.

Со ждрепка ќе се одреди кој ќе биде домаќин на единствениот меч, а доколку постои забрана за влез во таа земја, ќе се игра во другата.

На 22 јули годинава Александар Кирковски, планинар и планински тркач, реализира брзинско искачување на врвот Пелистер 2601 мнв со старт од Инфоцентар по патеката “преку Болници“.

Рутата до врвот и назад е долга вкупно 19 километри со 1200 висински метри, а Александар ја мина за вкупно 2 часа 05 минути и 31 секунда (1 час 16 минути успон, 49 минути спуст) што претставува најдобро регистрирано време досега на планината. За време на овој потфат имаше поддршка од битолските планинари: Горан Кузмановски, Саша Грбиќ, Стефан Петровски, Даниело Божиновски и Влатко Гроздановски.

Претходниот рекорд на оваа патека изнесуваше 2 часа 10 минути, а постои реално очекување во планинската заедница дека во иднина е можно оваа дистанца да се мине под 2 часа.

Брзинските искачувања на високите планини се актуелни од 90-тите години на Алпите, а во последните десетина години доживуваат светска популаризација. Со појавата на коронавирусот и откажувањето на најголем дел од спортските настани ширум светот, се повеќе спортисти се насочени кон различен тип на индивидуални потфати.

Во претходните неколку години Кирковски има реализирано брзински искачувања на повеќе светски врвови како Аконкагва 6962 мнв, Елбрус 5642 мнв, Мон Блан 4810 мнв, Матерхорн 4478 мнв и други.