Спорт
Италија со голема победа во Амстердам, Халанд-шоу во Белфаст!
Италија на Роберто Манчини се врати на победите, откако во Амстердам успеа со 1:0 да ја совлада Холандија и да го преземе првото место на табелата во групата 1 во Лига А во Лигата на нации на УЕФА.
Манчини стартуваше со само четири фудбалери од составот кој одигра 1:1 со Босна и Херцеговина, и мотивацијата на младите фудбалери се покажа бидејќи посебно во првото полувреме „аѕурите“ ја контролираа играта што беше крунисано во финишот на полувремето, кога Николо Барела постигна редок гол со глава по асистенцијата на Чиро Имобиле.
Во истата група, Полска се врати од раното водство на Босна и Херцеговина за да стигне до 2:1 победа и да се израмни со Холандија со три поени по два меча.
Во Лига Б, вистинска ѕвезда беше напаѓачот на Борусија Дортмунд, Ерлинг Халанд, кој постигна два гола и асистираше на уште еден за Норвешка да стигне до импресивна 5:1 победа на гости кај Северна Ирска. Таму Романија е лидер откако успеа на гости да ја совлада Австрија со 3:2.
Чешка со тим составен од „резервни“ играчи по одлуката на УЕФА да ги „изолира“ фудбалерите кои биле во контакт со позитивни на КОВИД-19, успеа да поведе против Шкотска, но на крајот не ја заддржа предноста и загуби со 1:2 во Оломоуц.
УЕФА ЛИГА НА НАЦИИ
ЛИГА А, ГРУПА 1
Холандија – Италија 0:1
Босна и Херцеговина – Полска 1:2
Табела: 1.Италија 4, 2.Холандија 3, 3.Полска 3, 4.БиХ 1
ЛИГА Б, ГРУПА 1
Австрија – Романија 2:3
Северна Ирска – Норвешка 1:5
Табела: 1.Романија 4, 2.Австрија 3, 3.Норвешка 3, 4.С.Ирска 1
ЛИГА Б, ГРУПА 2
Чешка – Шкотска 1:2
Израел – Словачка 1:1
Табела: 1.Шкотска 4, 2.Чешка 3, 3.Израел 2, 4.Словачка 1
ЛИГА Ц, ГРУПА 4
Казахстан – Белорусија 1:2
Албанија – Литванија 0:1
Табела: 1.Казахстан 3, 2.Албанија 3, 3.Белорусија 3, 4.Литванија 3
ХОЛАНДИЈА – ИТАЛИЈА
СЕВЕРНА ИРСКА – НОРВЕШКА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Ферстапен на пол-позицијата во Кина, Хамилтон ќе стартува од 18.место
Макс Ферстапен по победата во спринтот, доминираше и во квалификациите во пресрет на трката за Големата награда на Кина. Апсолутната доминација на Ред Бул ја потврди Серхио Перез кој трката ќе ја стартува од второто место.
Актуелниот светски првак со време 1:33.660 ја освои 37 пол-позиција во кариерата, а на Ред Бул му ја донесе јубилејната 100. победа во квалификациите.
Зад возачите на Ред Бул, од вториот ред трката ќе ја започнат Фернандо Алонсо (Астон Мартин и Ландо Норис (Мекларен).
Во Топ 10 место изборија Оскар Пјастри (Мекларен), двоецот од Ферари, Шарл Леклер и Карлос Саинц, односно Џорџ Расел (Мерцедес), Нико Хулкенберг (Хас) и Валтери Ботас (Заубер).
Во квалификациите потфрли Луис Хамилтон. Седумкратниот светски првак, откако спринт трката ја заврши на второто место, во квалификациите заврши на 18.место.
Траката за Големата награда на Кина, утре ќе започне во 9 часот по македонско време.
Спорт
Капитенот на Реал го напушта клубот на крајот од сезоната
На капитенот на Реал, Начо Фернандез (34) му истекува договорот на крајот од сезоната. „Марка“ објави дека Начо го известил Флорентино Перез дека нема да потпише нов договор туку дека ќе го напушти клубот по истекот на постоечкиот.
Начо оваа сезона забележа 36 настапи и главно беше стартер, акумулирајќи 2497 минути на теренот. Сепак, тоа се должи на повредите на Давид Алаба, Едер Милитао и Антонио Ридигер.
Анчелоти претходно изјави дека случајот на Начо е идентичен со оној на Лука Модриќ и Тони Крос. Поточно, тој му порачал дека доколку како клупска легенда сака да потпише нов договор и да остане во Реал, може да го стори тоа. Очигледно тој решил поинаку.
Начо целата своја кариера е во Реал, со клубот освои 24 трофеи и одигра вкупно 348 натпревари, на кои постигна 16 гола, иако никогаш не беше прво име на одбраната.
Начо има 24 настапи и за шпанската репрезентација со која лани ја освои Лигата на нации. „Трансфермаркт“ неговата вредност ја проценува на пет милиони евра.
Според медиумите, Начо, кариерата ќе ја продолжи во Серија А, наводно прв фаворит за неговиот потпис е Интер.
Спорт
Пиоли ќе добие отказ, постои список со пет имиња за негов наследник
Стефано Пиоли ќе биде тренер на Милан до крајот на сезоната, по што ќе добие отказ, пишуваат италијанските медиуми. Тоа ќе биде крај на петгодишната соработка која на Милан му ја донесе првата титула во Серија А по 11 години во 2022 година. На „Сан Сиро“ веќе размислуваат кој ќе биде нов тренер, а моментално се издвојуваат пет кандидати.
Според „газета дело Спорт“, најголеми фаворити се Пауло Фонсека и Хулен Лопетеги.
Фонсека е 51-годишен Португалец кој моментално раководи со Лил, а две години работеше во Италија како тренер на Рома. Лопетеги (57) оваа сезона е без работа откако се раздели со Вулверхемптон, во минатото тој беше тренер на Реал и Севилја и селектор на Шпанија.
Како резервни опции се споменуваат Кристоф Галтиер, поранешниот тренер на ПСЖ кој сега го води катарскиот Ал-Духаил и Марсело Гаљардо, долгогодишниот тренер на Ривер Плата, кој моментално го тренира саудискиот Ал-Итихад.
Во потрагата по нов тренер се приклучи и клупскиот советник Златан Ибрахимовиќ, а „Тутоспорт“, пишува дека тој го предложил Марк ван Бомел. Ван Бомел е актуелен тренер на Антверпен, со кој беше и шампион на Белгија, а во Милан играше во сезоната 2011/12 кога му беше соиграч Ибрахимовиќ.