За разлика од голем број на европски држави фудбалското првенство на Црна Гора ќе се игра во присуство на публика, потврдил премиерот Душко Марковиќ.

„Ќе биде дозволен ограничен број на публика на спортските натпревари“, рекол Марковиќ.

Во Европа фудбал во присуство на публика се игра во Белорусија, Гермнаците ја продолжија Бундеслигата пред празни трибини, а истото ќе го направат и останатите држави чии шампионати ќе продолжат.

Неодамна се прослави десетгодишнината на славната „триплета“ на Интер, освојувањето на тројната титула (Серија А, Копа Италија, Лига на шампиони), генерација во која играше и нашиот најуспешен фудбалер, Горан Пандев.

Таа генерација доби „митски“ размери кај навивачите на „нераѕурите“, така што не чуди што Интер на сите членови на шампионскиот тим им прати прстен, налик на прстените кои се доделуваат на шампионите во американските спортови, на кој пишува „Timеless“.

Пандев се пофали со прстенот на Инстаграм со порака „Благодарам Интер“.

Плановите дел од мечевите во Серија А да се играат од 16.30 часот во сред италијанското лето предизвикаа бура на реакции кај фудбалерите, кои сметаа дека се работи за скандалозна одлука.

Серија А би требало да се рестартира во средината на јуни по договарањето на протоколот за мечеви помеѓу италијанската влада и лигата, а до крајот на сезоната има дури 12 кола. Италијанските медиуми тврдат дека лигата планира да има повеќе мечеви во ист ден со стартови во 16.30, 18.45 и 21.00 часот.

„Да се игра во 16.30 часот во средина на летото во јули? Нема теорија да играме тогаш. Претседателите на клубовите мислат на ТВ-правата, а не на здравјето на фудбалерите“, изјави Умберто Калкањо, потпретседателот на Италијанската асоцијација на фудбалери (АИЦ) за „Ла република“.

Капитенот на Бреша, Даниеле Гасталдело беше уште построг.

„Го ризикувате здравјето на фудбалерите. Со толку мечеви, со игра на високи температури. Да се игра во 16.30 е скандалозно!“, изјави Гасталдело.