Стефано Пиоли немаше најдобар старт на кариерата како тренер на Милан, откако „росонерите“ во последниот меч од 8. коло на Серија А и покрај тоа што двапати имаа водство мораа да се задоволат со 2:2 реми со новиот прволигаш, Лече.

Мечот почна добро за „росонерите“ – Чалханоглу, фудбалерот кој често беше на мета на навивачите на Милан поради непостојаната игра, во 20. минута постигна прекрасен гол за водство на тимот, чии ултраси натпреварот го поминаа без навивање во знак на протест по слабите игри и именувањето на Пиоли (инаку навивач на Интер).

Меѓутоа, во второто полувреме, Лече успеа да израмни во 62. минута, откако беше досуден пенал по прегледувањето на ВАР-снимките. Фантастичниот Џиџи Донарума успеа да му го одбрани ударот, но одбиената топка повторно дојде пред Сенегалецот, кој ја смести во мрежата.

„Џокер“ на Пиоли беше Кшиштоф Пјонтек, кој влезе во игра во 67. минута и во 81. минута по одличната асистенција на Чалханоглу ја затресе мрежата на гостите. Кога се мислеше дека Милан, конечно, ја впиша и четвртата победа оваа сезона, Марко Калдерони во 92. минута од мечот постигна апсолутно прекрасен гол од далечина за поен за тимот од југот на Италија.

Жозе Мурињо беше еден од коментаторите на „Скај спорт“ за големото англиско дерби помеѓу неговиот поранешен клуб Манчестер јунајтед и Ливерпул и процени дека од 1:1 ремито поголеми фрустрации ќе има Јирген Клоп, додека Оле Гунар Солскјер треба да е горд на постигнатото.

„На Клоп не му се допаѓаше менито. Тој сакаше месо, но доби риба. Јунајтед со сите ограничувања кои ги имаат во моментов, играа со пет луѓе назад и беа солидни и не даваа шанса за транзиција. Имаа одличен скор со толку победи, но против тим со ниски блокови не можеа ништо. Тие можат да ги смачкаат противниците кои играат како што посакуваат тие. Јирген мора да е исфрустриран. Но, на ’Олд Трафорд’, место каде што е посебно да се победи, уште нема победено. Оле и Јунајтед ќе се помалку разочарани бидејќи една грешка ги чинеше два поени. Имаа план, и одеа под него и најверојатно резултатот е фер. Да бев Оле ќе бев горд“, изјави Мурињо.

Јирген Клоп пак изјави дека е задоволен од резултатот, но дека првото полувреме покажало со кои предизвици се соочува фудбалот со ВАР системот по две одлуки кои очигледно го изнервираа.

„Резултатот е океј. Не е тоа што го посакувавме, но мораме да бидеме задоволни според тоа како се одвиваше мечот. Не ми се допадна првото полувреме, бидејќи им дадовме шанса да играат како што сакаат – да бидат агресивни. Не беа подобри од нас, но правеа што сакаа. Постигнаа гол кој ги покажува проблемите со ВАР. Судијата Еткинсон дозволи мечот да продолжи токму поради ВАР. За мене тоа беше чист фаул. Тогаш постигнавме гол кој ни беше поништен. Сè беше против нас, но не загубивме, така што е океј. Во финишот бевме 100 отсто подобри“, изјави Клоп за „Скај спортс“.

Лалана постигна гол по 18 месеци и донесе реми за Ливерпул на „Олд Трафорд“ (видео)

Парма со 5:1 ја декласираше Џенова во меч од осмото коло на Серија А, уништувајќи му го дебито на тренерот Андреацоли и зголемувајќи ја мизеријата на Грифоне, кои остануваат претпоследни на табелата, и во исто време покажувајќи каков талент има 19-годишниот Швеѓанец со македонско потекло, Дејан Кулушевски.

Јурај Куцка го отвори резултатот во 37. минута од мечот, пред данскиот напаѓач на Парма, Андреас Корнелиус да постигне хет-трик (42., 45. и 50. минута) за да го најави потопот на Џенова. Горан Пандев излезе во игра во второто полувреме, и неговата замена, Андреа Пинамонти постигна утешувачки гол за гостите во 52. минута од мечот.

Конечните 5:1 ги постави шведскиот фудбалер со македонско потекло, и поранешен У-16 репрезентативец на Македонија, 19-годишниот Кулушевски, кој претходно асистираше на двата гола на Корнелиус. Кулушевски има настапи за У-21 репрезентацијата на Шведска, но уште не е повикан во сениорската репрезентација.