По фантастичната сезона во која стана првата канадска тенисерка со гренд слем титула со победата на САД опен, Бјанка Андреску е добитник на „Лу Марш трофејот“, како најдобар канадски спортист за 2019 година.

Тинејџерката пред една година беше речиси анонимна, но по победата над Серена Вилијамс во финалето на Флешинг Медоуз и искачувањето на четвртото место на ВТА листата, таа беше убедлвиа пред другите канадски спротисти.

„Да се биде прва тенисерка со оваа награда е навистина огромна чест и не го очекував ова. Мојот успех оваа година немаше да биде можен без поддршката од цела Канада“, изјави 19-годишната тенисерка.

Тинејџерката е ќерка на романски имигранти во Канада, и во 2019 година заврши со 48-7 скор на сите турнири. Во гласањето таа ги победи спринтерот Андре де Грасе, голферката Брук Хендерсон, НХЛ голманот Џордан Бинингтон и безбол-ѕвездата Мајк Сорока.

Францускиот врховен суд ја одби жалбата на фудбалерот на Реал Мадрид, Карим Бензема за отфрлање на обвинувањата од 2015 година за наводната уцена со секс-лентата на неговиот поранешен соиграч од француската репрезентација, Матју Валбуена.

Ова значи дека Бензема може да одговара кривично бидејќи жалбата се обидуваше да ја отфрли легалноста на истрагата за уцена во која наводно бил вклучен и Бензема. Судот одлучи дека методите на истрага кои ги користела француската полиција биле легални.

Валбуена тврдеше дека е жртва на уцена откако добил телефонски повик во кој непознатиот човек тврдел дека има секс-лента со фудбалерот. Француското обвинителство тврди дека Бензема бил „посредник“ меѓу Валбуена и уценувачите, од кои еден е наводно пријател од детството на Бензема. Легалниот тим на Бензема тврдеше дека полицијата направила „местенка“ откако во телефонските повици еден полицаец се претставувал како пријател на Валбуена. Сега, судот во Версај ќе треба да утврди дали случајот ќе оди на суд.

Поради овој скандал, Бензема е „исклучен“ од француската репрезентација, откако селекторот Дидие Дешам повеќе пати ја отфрлаше можноста тој да се врати кај „триколорите“, а неодамна Бензема најави дека би можел да игра за земјата на неговите родители, Алжир, по што следуваше демант од алжирскиот селектор.

Актуелните шампиони Ливерпул се подготвуваат за последниот меч по групи во Лигата на шампионите против Салцбург како да играат финале, вели менаџерот Јирген Клоп.

Ливерпул се лидери во групата Е со поен пред Наполи и три пред Салцбург, а трите тима имаат шанса за пласман понатаму, но постојат и шанси да бидат елиминирани. Во последното коло, Ливерпул одигра 1:1 со Наполи, а Салцбург на гости го победи Генк со 4:1.

„Минатиот натпревар одигравме реми и секако Наполи беа позадоволни, а Салцбург најзадоволни, бидејќи сега знаат дека мора да не победат. Веднаш знаев дека сега имаме финале и мораме да бидеме подготвени за финале. Како секогаш да мораме да ги правиме работите на тежок начин, така што сме навикнати“, вели Клоп.

На Ливерпул му треба реми против Салцбург или пораз на Наполи од Генк, но Клоп вели дека одат на победа. Ако Наполи го победи Генк, Салцбург мора да го победи Ливерпул со подобар резултат од 4:3 поразот на „Енфилд“ за да ги елиминираат шампионите.

„Салцбург мораат да победат и тоа е единственото јасно пред натпреварот. Тоа поставува и темпо на мечот. Не знам како тие ќе пријдат кон ченот, но сигурно ќе одат на победа. Нема да одиме на поен, бидејќи полесно е да се оди на победа“, додава Клоп.