Спорт
Кејн и Роналдо со хет-трик за убедливи победи, Чешка го елиминираше Косово (видео)
Хери Кејн и Кристијано Роналдо постигнаа по три гола за на своите репрезентации да им донесат убедливи победи во квалификациите за Евро 2020, по кои Англија веќе е патник на континенталниот шампионат, додека Португалија треба само во следниот меч против Луксембург да победи за да се приклучи на елитата.
Хери Кејн постигна три гола за само 12 минути, за Англија со 7:0 да ја „разбие“ Црна Гора за обезбедување на првото место во групата А, откако „Албионот“ постигна пет гола во првите 37 минути од мечот. Стрелци беа и Окслејд-Чембрлен, Абрахам и Рашфорд, а еден автогол си постигна Александар Софранац.
Во истата група, Чешка направи пресврт за 2:1 победа над Косово, со што се приклучи на Англичаните на Евро 2020 и во исто време ги прати Косовците на потенцијална пресметка со Македонија за пласман на шампионатот преку Лигата на нации на УЕФА.
Кристијано Роналдо, пак, постигна хет-трик за да ги предводи Португалците до 6:0 победа над Литванија, со која тие останаа на второто место во групата Б, со поен предност пред Србија, која се намачи за 3:2 победа над Луксембург. Во последното коло Португалците гостуваат на Луксембург, додека Србите патуваат во Украина, која веќе е пласирана.
Светскиот шампион Франција обезбеди пласман пред да стартува мечот со Молдавија, откако Турција одигра 0:0 со Исланд, и беше потребен пенал на Оливие Жиру во финишот на мечот за неубедлива 2:1 победа.
ЕВРО 2020, КВАЛИФИКАЦИИ
ГРУПА А
Чешка Република – Косово 2:1
Англија – Црна Гора 7:0
Табела: 1.Англија 18, 2.Чешка 15, 3.Косово 11, 4.Црна Гора 3, 5.Бугарија 3
ГРУПА Б
Португалија – Литванија 6:0
Србија – Луксембург 3:2
Табела: 1.Украина 19, 2.Португалија 14, 3.Србија 13, 4.Луксембург 4, 5.Литванија 1
ГРУПА Х
Турција – Исланд 0:0
Албанија – Андора 2:2
Франција – Молдавија 2:1
Табела: 1.Франција 22, 2.Турција 20, 3.Исланд 16, 4.Албанија 13, 5.Андора 4, 6.Молдавија 4
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Лазаров: Манасков е во врвна форма, затоа го повикав, тој не го одби повикот
Селекторот Кирил Лазаров ги собра репрезентативците во пресрет на ЕХФ неделата. Македонија во овој термин ќе одигра два натпревари против Јапонија.
Од списокот отпадна голманот Никола Митревски поради повреда. На неговото место е повикан Марко Кизиќ.
Исто така со националниот тим е и Петар Атанасијевиќ откако Дејан Манасков го одби повикот на селекторот.
Селекторот појасни дека Манасков последните два месеци игра во одлична форма, дека покажува врвна класа. Нема што повеќе да каже откако играчот на Еурофарм Пелистер го одби повикот. Посочи дека негова задача е да ги повикува оние кои се во најдобра форма.
Макееонија против Јапонија ќе игра во Скопје на 30.октомври. Овој натпревар ќе се игра зад затворени врати. Вториот меч е на програмата на 1 ноември во Куманово.
foto/ macedoniahandball.com.mk
Спорт
Де Брујне на пауза до крајот на годината?
Победата на Наполи над Интер од 31:, во саботата во дербито на Серија А беше засенета од новата повреда на Кевин де Брујне.
Белгиецот го постигна првиот гол од пенал и ведбаш се фати за мускулот. Побара замена и со помош на медицинскиот тим го напушти теренот. Во вториот дел се врати кај соиграчите на клупата за резерви, се движеше со помош на патерици.
Според италијанските медиуми, во клубот постои страв дека може да станува збор за сериозен проблем со мускулот.
Иако Де Брујне изгледаше смирен по натпреварот, медицинскиот тим на Наполи не сака да ризикува со оглед на неговата неодамнешна историја на повреди.
Се очекува белгискиот играч од средниот ред да помине детални медицински прегледи кои ќе ја утврдат сериозноста на повредата, а прелиминарните проценки покажуваат дека може да станува збор за повреда од висок степен, која би го оставила надвор од игра неколку недели, па дури и подолго, бидејќи се зборува за пауза до крајот на календарската 2025 година.
Евентуалното отсуство на Де Брујне би било голем удар за тимот на Конте, кој го врати моментумот во трката за Скудетото во последните неколку кола.
Спорт
Јувентус го отпушти Игор Тудор
Италијанскиот гигант Јувентус одлучи да му се заблагодари на Игор Тудор за соработката по серијата лоши резултати што кулминираа со пораз од Лацио во Серија А, пишуваат италијанските медиуми.
Веста за неговата замена ја потврди „Скај Спорт Италија“, со кратко и јасно соопштение на платформата „X“:
„ Игор Тудор повеќе не е тренер на Јувентус“.
Поразот против Лацио беше трет по ред во домашното првенство, а Јувентус е без победа осум натпревари по ред, на последните четири тимот не постигна ниту еден гол.
Последниот триумф на тимот од Торино беше на 13 септември против Интер. Оттогаш, тие освоија само пет од можни 24 бода во Серија А и Лигата на шампионите, далеку под традиционалните стандарди на клубот.
Тудор го предводеше Јувентус од 23 март оваа година. Забележа десет победи, осум нерешени и шест порази.
Како привремено решение, „Старата дама“ го назначи Масимо Брамбиле, кој ќе го предводи тимот против Удинезе.

