Поранешната шампионка на Ју-ес опен Флавија Пенета тврди дека годишениот триумф на Ема Радукану, на терените во Њујорк, не е добар за женскиот тенис.

Радукану до трофејот на последниот гренд слем во сезоната дојде преку квалификациите.

„Не ми се допаѓа тоа. Не постои континуитет. Мислам дека тоа не е добро за женскиот тенис. Кога јас играв немаше шанси млада девојка која игра квалификации на крајот да освои гренд слем титула. Радукану тоа го направи оваа година. Тука нешто не во ред“, рекла Пенета.

„Нема повеќе харизма, поради што женскиот тенис тешко се продава“.

Титулата во Њујорк на Радукану ѝ донесе 1.800.000 фунти, спонзорски договор со „Диор“ и 2.000.000 нови следбеници на „Инстаграм“.

На првиот турнир по Ју-ес опен, мастерсот во Индијан Велс, Радукану испадна во второто коло.

Јувентус се уште ги чувствува последиците од заминувањето на Кристијано Роналдо. Португалецот го напушти Торино на 28.август, тој по 12 години се врати во Манчестер јунајтед. Капитенот Џорџо Кјелини мисли дека трансферот требало да се случи порано, тимот немал време да се адаптира на заминувањето на Роналдо.

„Ја започнавме обновата, ова е нов почеток. Да останеше Роналдо, тимот ќе имаше дополнителен квалитет, со задоволство ќе го користевме неговиот потенцијал, но тој повеќе размислуваше за сегашноста отколку за иднината. Замина на 28.август, ќе беше подобро за нас доколку заминеше порано. Неговата одлука предизвика шок и тоа го плативме со губењето на бодови. Да си заминеше на 1.август ќе имавме повеќе време да се подготвиме за она што не очекува“, изјави Кјелини за ДАЗН.

Капитенот на Јувентус верува дека Роналдо барал нов предизвик во кариерата.

„Во односот со Роналдо дојдовме до тоа тој да бара нов предизвик, тим кој ќе игра за него, бидејќи кога ќе се најде во таков тим тој е „убиец“. Тоа го покажа во годините кои ги мина во Јувентус“.

Јувентус, во Серија А, по осум кола се наоѓа на седмото место со десет бода помалку од лидерот Наполи.

Ансу Фати го продолжи договорот со Барселона. Договорот важи до јуни 2027 година. Откупната клаузула е поставена на 1.000.000.000 евра. Неколку дена претходно под исти услови, договорот, со Барселона го продолжи и Педри, а наскоро се очекува тоа да го направи и третиот голем талент, Гави.

Анту Фати, неодамна се врати во тимот, откако една година паузираше поради повредата на коленото. Со заминувањето на Лионел Меси, клубот му ја додели „десетката“.

„Бројот 10 не претставува притисок туку мотивација. Никој не може да биде како Меси, или како Пујол и Чави. Јас ќе одам по мојот пат. Можеше „десетката“ да ја добие некој друг, за среќа дојде кај мене. Благодарен сум им на капитените што ми ја понудија“, рекол Фати на денешната прес конференција.

Минатата недела поранешниот претседател на Барселона, Џосеп Марија Бартомеу, откри дека минатото лето одбил 150.000.000 евра од еден англиски клуб за Фати.

„Од првиот ден на мојот менаџер му кажав дека сакам да остана тука. Можеби имав понуди, но секогаш знаев дека сакам да растам и да успеам во Барселона“.

Каталонците и Фати, во недела ги очекува најголемото дерби, на „Ноу Камп“ ќе гостува Реал Мадрид.