Спорт
Кој вели дека парите не го „вртат“ фудбалот? Вечерва: Ред бул контра Катар
Кога вечерва во Португалија на теренот ќе истрчаат Пари Сен-Жермен и РБ Лајпциг, борбата ќе биде за место во финалето на најелитното клупско натпреварување на светот, Лигата на шампионите, но и уште еден доказ дека „парите го вртат светот“.
Францускиот шампион и третопласираниот тим од германската Бундеслига, секако, стигнаа до ова полуфинале без контроверзи и со својата фудбалска сила, меѓутоа, начинот на кој стигнаа до овие „височини“ за многу фудбалски „традиционалисти“ е само показател за сè што не чини во фудбалот.
Од една страна тука е Пари Сен-Жермен, клубот од француската престолнина кој беше трансформиран од милијардите на катарските ѕвезди, а од друга страна тимот кој Ред бул го трансформираше и го навлече бесот на германските навивачи.
КРИЛЈА!
Ред бул, австриската компанија за производство на енергетски пијалоци која направи „бум“ во Формула 1, во 2009 година го откупи германскиот петтолигаш ССВ Маркранштад, откако сите други опции предизвикаа отпор од навивачите.
Лајпциг беше идеален дом за проектот на Ред бул – голем град во поранешна Источна Германија без прволигашки фудбал, како ривал на традиционалните големи имиња во Бундеслигата, во прв план Баерн Минхен и Борусија Дортмунд. Откако Бундеслигата не им дозволи да го крстат тимот Ред бул Лајпциг, тие најдоа „елегантно“ решение – „RasenBallsport Leipzig“, но огромното лого на градите не остава на сомнеж што точно значи РБ.
Германците ги обвинуваат Ред бул дека го „кршат“ правилото „50+1“, односно дека членовите на тимот (односно фановите) мораат да имаат мнозинство од акциите во тимот. Во Ред бул, помалку од 20 луѓе, сите поврзани со Ред бул, ги имаат акциите во клубот. Ова придонесе тимот да биде нарекуван „најомразениот во Германија“.
ПЕТРОДОЛАРИ!
Од друга страна вечерва ќе го имаат Пари Сен-Жермен, клуб со далеку поголемо европско педигре, но и клуб кој беше трансформиран од според многу француски фанови, недозволено фрлање на евра.
Qatar Sports Investments (QSI), државната компанија од блискоисточната земја, во 2011 година пристигна во Париз со големи амбиции, кои полека се остваруваат. Покрај фудбалскиот успех, ПСЖ е несомнено проект на една држава да добива политички поени преку спортот.
Слична ситуација е и во Манчестер сити, англискиот премиерлигаш во сопственост на државни компании од Обединетите Арапски Емирати (ОАЕ), што според многумина донесе до ситуација во која фудбалските клубови служат интереси на одредени држави, во необична геополитичка игра.
Досега низ парискиот клуб протекоа над милијарда евра, а клубот ги плати и двете најголеми суми за еден фудбалер, кои тешко ќе се срушат – Нејмар и Килијан Мбапе.
До пред овогодишното натпреварување, ПСЖ имаше три порази во осминафиналето, а претходно три порази во четврт-финалето, што според многумина беше доказ дека „парите не го купуваат фудбалот“, но оваа сезона може да биде многу поинаку. Парите, очигледно, се многу важни во фудбалот…
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Рикелме го доближи Атлетико до ЛШ
Минијатурата на Родриго Рикелме во 5. минута на Балеарските Острови не само што му донесе победа на Атлетико Мадрид над Мајорка оваа сабота навечер, туку веројатно и му обезбеди пласман во Лигата на шампионите наредната сезона.
Без овие три бода, Атлетик Билбао би имал солидни шанси да го помине Атлетико во преостанатите четири кола од Ла Лига, но вака исходот од трката за четвртото место на табелата е речиси решен.
По третолигашкиот гол на 24-годишниот Шпанец и четвртиот вкупен гол сезонава, разликата меѓу двата црвено-бели клуба е шест бода.
Мајорка е во долниот дел на табелата, но има шест бода повеќе од Кадиз кој се наоѓа во опасната зона и извесно е дека финалистот во Купот на Шпанија ќе избори опстанок.
Rodrigo Riquelme’s goal! 🔥🔥🔥🔥 pic.twitter.com/5YARGEy6hx
— Atletico Universe (@atletiuniverse) May 4, 2024
Спорт
Ферстапен на пол-позицијата во Мајами, сезонава има шест од шест
Возачот на Ред Бул, Макс Ферстапен, ја освои својата шеста пол-позиција на исто толку трки оваа сезона. Холанѓанецот беше најбрз во квалификациите за трката на Големата награда на Мајами. За Ферстапен ова е седма пол-позиција по ред и сега е на само еден до израмнување на рекордот на Аиртон Сена.
Ферстапен, кој неколку часа претходно триумфираше во спринтот на Флорида, ја забележа 38. пол-позиција во кариерата со круг од 1:27.241 минути. Тој за 141 илјадитинки беше побрз од Шарл Леклер во Ферари.
Двајцата ги следеше вториот возач на италијанскиот тим, Карлос Саинц Јуниор, кој заостануваше помалку од една десетинка зад својот тимски колега. Шпанецот за само пет илјадити делови од секундата беше побрз од Серхио Перез во Ред Бул.
Најдобар меѓу останатите беше Ландо Норис во Мекларен, пред тимскиот колега Оскар Пјастри и двоецот на Мерцедес Џорџ Расел и Луис Хамилтон. Топ 10 беше комплетиран од Нико Хилкенберг во автомобилот на Хас и возачот на тимот РБ Јуки Цунода.
Траката за Големата награда на Мајами утре ќе започне во 22 часот по средно-европско време.
Спорт
(Видео) Сасуоло повторно го победи Интер
Фудбалерите на Сасуоло славеа минимална победа над италијанскиот шампион Интер. Сасуоло сезонава забележа седум победи, две од нив се против Интер. Интересно ова се единствените порази на Интер сезонава во Серија А.Сасуоло остана на 19.место со 29 бода. Пред овој тим се Удинезе (29), Емопли (31), фросиноне (31), Верона (31), Каљари (32), но сите имаат натпревар помалку.
Стрелец на единствениот, гол беше Арманд Лориен во 20. минута откако Џош Доиг му ја одзеде топката на незаинтересираниот Дензел Дамфрис практично на гол-линијата и потоа му асистираше на Французинот во срцето на шеснаесетникот.
До крајот на сезоната Сасуоло ќе гостува кај Џенова, ќе го пречека Каљари и потоа ќе гостува во Рим кај Лацио.