Иако повеќе извори тврдат дека новитетот на Мерцедес, подвижниот волан, или официјално ДАС систем (dual-axis steering), нема да има огромно влијание на перформансите како двојниот дифузер од минатото, ривалите секако се фатени неподготвени од ова достигнување на шампионите.

Дилемата сега е дали да се потрошат ресурси за развивање на сопствена верзија на ДАС, иако ФИА потврди дека од 2021 година ваков систем ќе биде нелегален, а се верува дека е можен и протест на тимовите веќе на првата трка во Мелбурн.

Ферари, кои лани беа на мета на техничките директиви на ФИА околу нивниот мотор, сега велат дека тие ќе бараат објаснување од федерацијата.

„Уште не сме разговарале со ФИА за тоа, но секако, ќе побараме објаснување.Важно е да разбереме што е дозволено, а што не, но нема да се противиме на ФИА на нивната одлука. Знаеме многу малку за системот во моментов. Очекуваме ФИА да биде позаинтересирана. Доколку развиваме таков систем, тој ќе биде подготвен во средината на сезоната“, вели Матија Биното, шефот на Ферари.

Воланот на Мерцедес ќе биде забранет, но само од 2021 година!

Џенаро Гатузо очекува да види „бестрашен“ Наполи против Барселона во пресметката од осминафиналето на Лигата на шампионите, и во исто време посочува дека е „бесцелно“ да му се игра „фластер“ на Лионел Меси.

Ова ќе биде прв меч на Гатузо како тренер во Лигата на шампионите, и на „Сан Паоло“ го пречекува моќниот тим на Барселона.

„Играме против голем тим. Му благодарам на тимот и на Карло Анчелоти, бидејќи јас не направив ништо да сме тука. Емоциите се тука, но сакам да видам Наполи кој не се плаши, и кој е подготвен да страда. Со Кике Сетиен, Барселона го прави истото што го правеше со години. Со Валверде ја освојуваа топката за 10 секунди, а со Сетиен за тоа им се потребни шест секунди. Ќе дојдат да не нападнат и мораме да сме подготвени. Некаде прочитав дека треба да играме ’фластер’ на Лео Меси, но тоа е бесцелно. Тој не само што е најголемиот според фудбалот, туку и според работите кои ги прави надвор од фудбалот. Тој е совршен пример за децата, никогаш не кажува непристојни работи. Прави работи кои можете да ги видите само на ’Плејстејшн’, работи кои не можете да ги замислите“, вели Гатузо.

Претседателот на Јувентус, Андреа Ањели во интервју за „Радио 24“, вели дека самиот го избрал Маурицио Сари да биде тренер, но признава дека е фасцинантно да се гледа Антонио Конте како тренер на ривалите од Интер.

„Го сакавме Маурицио Сари и го земавме Сари. Антонио Конте е симбол на Јувентус бидејќи освои повеќе титули и трофеј од Лигата на шампионите. Имаме мирен однос со него и се почитуваме, но пред сè сме професионалци. Тој реши да го враќа Интер кај победниците заедно со претседателот Стивен Жанг, кого го познавам и почитувам, и тоа е нешто што ме фасцинира“, вели Ањели.

Тој исто така има и голема почит кон Лацио, кои неочекувано се само еден поен зад „бјанконерите“ и станаа закана за шампионските амбиции на двата побогати клубови.

„Морате да се плашите од тие кои не се плашат. Тие немаат обврска да победуваат и тоа е нивна предност. Но, тоа може да биде и непријател ако по еден или два порази се задоволуваш со место во Лигата на шампионите. Во споредба со Интер имаат целосно поинаква филозофија и не можете да ги споредувате. Интер не се толку ’лесни’ во игра, бидејќи Конте си зеде обврска да победува“, додава Ањели.