Берзанските движења (акциите) конкретно за Манчестер јунајтед даваат најдобар одговор на прашањето зошто клубовите сакаат да се откачат од УЕФА и да направат свое натпреварување.

Пред три дена, кога беше јасно дека ќе се формира Суперлигата, цената на акциите на „црвените ѓаволи“ од 16,17 долари скокнаа на 17,60, што веднаш ја зголеми вредноста на клубот за речиси 200 милиони долари.

Сепак, синоќешните случувања, откако стана јасно дека нема ништо од формирањето на Суперлигата (барем засега), направија нова промена на берзата.

Акциите на Јунајтед наеднаш паднаа на истото ниво како и пред некој ден, дури и пониско.

Ако е точно тоа што го пишува шпански „Мундо депортиво“, англиските клубови сепак најдобро ќе поминат. Шпанскиот весник пишува дека УЕФА им дала огромни пари на премиерлигашите за да ја напуштат Суперлигата.

Женската ракометна репрезентација на Македонија со нов убедлив пораз од Романија, овој пат на домашен терен во Скопје, во СЦ „Јане Сандански“, со 20-35 го заврши баражот за пласман на Светското ракометно првенство. И по 9 години, нашите најдобри ракометарки не успеваат да се пласираат на едно големо натпреварување.

Сѐ беше познато уште по првиот меч одигран во Букурешт во кој Романките славеа со +11 (33-22).

Девојките предводени од Симе Симовски го загубија првото полувреме со 18-10 иако воведот на мечот навестуваше поинаков расплет.

Набргу по стартот, Македонија поведе со 3-1, но сѐ друго потоа во триесетте минути од првиот дел беше во знакот на феноменалната Кристина Неагу (која во второто полувреме доби поштеда од селекторот Василе) и нејзините репрезентативни колешки. Набргу со серија од 4:0 Романија го презеде водството.

Предноста за Романија постепено растеше за највисоки +8 по крајот на првиот дел.

Слична поставеност на теренот и во второто полувреме.

Македонските ракометарки грешеа во нападот, а Романките од контри и полуконтри ја казнуваа секоја наша грешка за конечни 20:35.

Најпрецизни во победничката селекција беа Моиса со 8 гола и Пинтеа со 4 гола.

Најпрецизни кај Македонија беа Герогиевска со 6 и Ливриниќ со 5 гола.

Освен Романија, пласман на мундијалот преку бараж-дуелите досега обезбедија и селекциите на Русија, Чешка, Австрија, Унгарија, Германија и на Црна Гора.

Бекот на Бруклин Нетс, Џејмс Харден – Брадата, има проблеми со закрепнувањето од повредата на задниот мускул на ногата. Иако изгледаше дека закрепнувањето оди како што треба и сѐ поблиску е враќањето на паркетот, од клубот информираат дека дошло до влошување на состојбата и сега останува дилемата кога кошаркарот ќе се врати во стројот.

Харден е надвор од терените од 5 aприл кога се повреди на мечот против Њујорк Никс.

„Се вративме на почетокот на рехабилитацијата. Ќе се врати кога ќе може да се врати. Можеби тоа да е за плејофот, а можеби и пред тоа“, рече тренерот на екипата, Стив Неш.

Минатиот викенд генералниот менаџер на екипата, Шон Маркс, беше многу оптимистичен и рече дека Брадата ќе почне со тренинзи за 4-5 дена, но сега ситуацијата е поинаква.

Харден е деветкратен НБА-олстар, троен најдобар стрелец на лигата и МВП за сезоната 2017/2018.

Пред сезонава да дојде во Бруклин Нетс, настапуваше за Хјустон, односно за Оклахома.

Пред повредата се сметаше дека тој е еден од најсериозните кандидати за МВП-титулата. Откако ги засили „мрежичките“, има 25,4 поени, 8,7 скока и 11 асистенции од меч.