Спорт
Лаказет супер-замена за Арсенал, Лидс како „воз“ преку Вест Бром

Арсенал, конечно, сврза две победи во низа во Премиер лигата, откако Александер Лаказет постигна гол само 21 секунда откако влезе во игра за 1:0 победа на гости кај Брајтон, додека Лидс со 5:0 ги декласираше Вест Бромвич Албион, во меч во кој Езѓан Алиоски постигна фантастичен гол за тимот на Марсело Биелса.
По првото полувреме без голови, Лаказет влезе во игра во 66. минута, и само 21 секунда откако беше во игра доби одлична топка од младиот Букајо Сака и ги донесе „топчиите“ во водство. Ова е втора победа во низа за тимот на Микел Артета по таа над Челси (3:1) со што се прекина една црна низа за лондонскиот клуб. Арсенал сега е на 13. место во лигата со 20 освоени поени, додека Брајтон е над зоната за испаѓање на 16. место со 13 поени.
На „Хоторнс“ пак, ВБА на Сем Алардајс по 1:1 ремито со Ливерпул на „Енфилд“, доживеа потоп против Лидс јунајтед. Роман Соерс уште во 9. минута си постигна комичен автогол, по што дојде фантастичниот гол на Алиоски во 31. минута, за до крајот на полувремето да биде 0:4 по головите на Херисон и Родриго. Рафиња во второто полувреме додаде уште еден гол во меч во кој ВБА имаше неверојатни 20 отсто од поседот на топката.
Барнли во меч кој може да биде клучен во борбата за опстанок со 1:0 го совлада последнопласираниот Шефилд јунајтед, додека Саутемптон и Вест хем одиграа 0:0.
ПРЕМИЕР ЛИГА, 16.КОЛО
Брајтон – Арсенал 0:1
Вест Бромвич Албион – Лидс 0:5
Барнли – Шефилд јунајтед 1:0
Саутемптон – Вест хем 0:0
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Најскапото засилување во историјата на Аталанта се пресели во Бешикташ

Напаѓачот од Мали, Ел Билал Туре (23) ја напушти Аталанта и ќе го помине остатокот од сезоната на позајмица во редовите на Бешикташ. Турскиот клуб ќе може да го откупи неговиот догоговор по завршувањето на сезоната.
Пред две години, Туре стана најскапото засилување во историјата на Аталанта кога дојде од Алмеира за нешто повеќе од 30 милиони евра.
Сепак, тој не се снајде во Бергамо. Речиси веднаш по пристигнувањето во Италија, тој заработи сериозна повреда на тетивата, што го спречи да игра до февруари.
Минатата сезона ја помина на позајмица во Штутгарт, а сега се сели во Бешикташ.
Претходниот тренер на Аталанта, Џан Пјеро Гасперини, не беше задоволен од неговата форма, а новиот тренер на „Ла Деа“, Иван Јуриќ, очигледно не смета ниту на него.
Тој одигра вкупно 17 натпревари за Аталанта, постигнува три гола, додека минатата сезона одигра и 17 натпревари за Штутгарт, постигнува три гола.
Туре е роден во Брегот на Слоновата Коска, но игра за репрезентацијата на Мали, вза која одигра 25 натпревари и постигна девет гола.
Спорт
Тотална промена во ждрепката за Лига Европа и Конференциската лига

Ждрепката за групните фази на Лигата на Европа и Лигата на Конференции ќе се одржи на една церемонија, а тоа носи голема промена во самиот процес. Наместо традиционалното извлекување со топчиња, распоредот ќе биде одреден со софтвер.
На сцената ќе се употреби само едно копче. Ќе се притиска на самиот почеток на обете извлекувања, што ќе активира програма која случајно ги одредува противниците и редоследот на домашните и гостинските натпревари.
Откако софтверот ќе ги обработи сите податоци, распоредот ќе биде објавен постепено.
Церемониите за извлекување започнуваат во петок, 29 август, во 13 часот по средноевропско време. Ќе биде извлечена и Шкендија, доколку го помине Лудогорец ќе биде во ждрепката за Лигата на Европа, во спротивно македонскиот првак оди во Конференциската лига.
Спорт
Реал Мадрид издвојува најмногу за плати од сите клубови во Европа

Реал Мадрид и во новата сезона 2025/2026 го потврдува статусот на клуб со највисоки плати во европскиот фудбал. Според податоците на специјализираните страници „Betideas“ и „Capology“, просечната годишна плата на играчите на „кралскиот клуб“ е 11,2 милиони евра.
Оваа бројка е дури за 60 проценти повисока од сумата што ја издвојуваат повеќето други европски гиганти. Интересно е што ова е сепак мало намалување во споредба со минатата сезона, кога просекот беше малку повеќе од 12 милиони евра.
Далеку зад Реал Мадрид е нивниот најголем ривал, Барселона, чии играчи заработуваат просечно 7,91 милиони евра годишно. Каталонците исто така забележаа пад, со оглед на тоа што минатата сезона просекот беше 8,5 милиони евра.
Третото место на рангирањето го зазема Манчестер сити со просечна плата од 7,43 милиони евра. Сепак, за разлика од шпанските гиганти, англискиот клуб ја зголеми својата сметка за плати за повеќе од еден милион евра во споредба со претходната сезона.
По водечкото трио следува Баерн Минхен со 7,38 милиони евра, потоа Пари Сен Жермен и Арсенал, кои издвојуваат околу 7 милиони евра за просечна плата.
Клубови со највисоки просечни бруто плати во светот
1. Реал Мадрид – 11,2 милиони евра
2. Барселона – 7,9 милиони евра
3. Манчестер Сити – 7,43 милиони евра
4. Баерн Минхен – 7,38 милиони евра
5. ПСЖ и Арсенал – 7 милиони евра
6. Ливерпул и Манчестер Јунајтед – 6 милиони евра
7. Челзи и Тотенхем – 4,5 милиони евра
Foto/ EPA/J.L. Cereijido