Поранешниот тренер на Реал Мадрид Сантијаго Солари открил дека сака да работи во Премиер лигата.

Аргентинецот неколку месеци, минатата сезона, беше тренер на Реал. Доби отказ по елиминацијата од Ајакс во Лигата на шампионите.

Неодамна тој бил уловен на трибините на „Стенфорд Бриџ“ како го следи натпреварот помеѓу Челси и Кристал Палас, поради што британските медиуми шпекулираат дека тој наскоро ќе работи во Премиер лигата.

„Би сакал да работам во Премиер лигата. Често ги гледам натпреварите. Ова е врвно првенство кое се наоѓа во еден од најдобрите периоди во својата историја. Тука играат врвни играчи и работат некои од најдобрите тренери во светот. Покрај сите тие различни националности и стилови на игра да не заборавиме дека минатата сезона финалистите во Лигата на шампионите и Лига Европа беа од Премиер лигата“, истакнал Солари.

Покрај искуството што го има со првиот тим на Реал, Солари бил тренер и на Б екипата на „кралскиот клуб“.

Кошаркарите на Милвоки бакс ги победија Портланд трејлблејзереси, 137:129, во еден од двата натпревари што се одиграа изминатата ноќ во НБА-лигата. Во вториот натпревар Њу Орлеанс пеликанси славеа над Финикс Санс, 124:121.

Милвоки предводени од Јанис Адетокумбо од почетокот го контролираа натпреварот, водеа од првата минута, Портланд се обидоа во финишот, но не успеаја да се вратат во мечот.

„Грик Фрик“ Адетокумбо имаше лоша шутерска вечер, но ги наполни сите статистички колони со импресивни бројки. Гркот погоди девет од 27 шутеви, а мечот го заврши со 24 поени, 19 скока и 15 асистенции. Најефикасен во редовите на Милвоки бакси беше Ерик Бледсо со 30 поени.

Двоцифрен број поени кај Бакс постигнаа уште Пет Контан (18), Ди Виченцо (16), Весли Метјуз (12) и Брукл Лопез (10).

Портланд, како и на претходниот, играа без најдобриот играч Демијан Лилард. Во тимот беше Кармело Ентони, кој одигра добра меч (18 поени, седум скока, четири асистенции).

Брилијантен меч за Портланд одигра Си-Џеј Мекалум (37 поени, шест скока, 10 асистенции).

Милвоки имаа скор 12/3 и се лидери на Истокот, додека Портланд со скор 5/11 се на 14 место на Западот.

Кратко траеше драмата во ракометниот клуб Металург, откако по состанокот со челниците на клубот тренерот Зоран Кастратовиќ остана на функцијата.

Кастратовиќ, претходно, си поднел оставка поради недоразбирањата што ги имал со одредени играчи.

Инаку, Кастратовиќ е вториот тренер кој си поднесува оставка во клубот од почетокот на сезоната. Претходно Дамир Стојановиќ, кој само еден месец беше кормилар на „Металурзите“, реши да ја напушти Автокоманда.

Ракометарите на Металург за три дена ќе играат против Горење во ЕХФ купот. На Металург му е потребна победа со повеќе од пет голови разлика за да се пласира во фазата по групи во ова натпреварување.