Тони Крос го продолжи договорот со Реал Мадрид до 2023 година, ставајќи крај на шпекулациите дека сака да замине од „Сантијаго Бернабеу“.

Германецот имаше договор со мадридскиот клуб до 2022, но сега со обновениот договор ќе остане барем уште 12 месеци, откако Зинедин Зидан ја има довербата во фудбалерот од средниот ред.

„Реал Мадрид и Тони Крос се согласија да го продолжат договорот на фудбалерот до 30 јуни 2023 година“, објавија на веб-сајтот на Реал Мадрид.

Неодамна Зидан му изрази доверба на Германецот.

„Тони е клучен фудбалер. Тој е во Мадрид веќе пет години и заврши одлична работа. Се работи за голем фудбалер кој носи мир на теренот. Секогаш ми се допаѓал“, изјави Зидан.

Крос дојде од Баерн Минхен во 2014 година и со Реал освои три титули од Лигата на шампионите и една од Ла лига со над 230 настапи.

Comunicado Oficial: renovación de Toni Kroos.#RealMadrid | #HalaMadridhttps://t.co/ohPQrtL0EV

— Real Madrid C.F.⚽ (@realmadrid) May 20, 2019

Двократната гренд слем шампионка, Викторија Азаренка, признава дека кога останала бремена во 2016 година, мислела дека тоа значи крај на нејзината кариера, но вели дека по раѓањето на својот син е уште посилна.

Белорусинката беше на шестото место на ВТА-листата кога во јули 2016 престана со игра пред да се врати на спортот во јуни 2017 година.

„Бев многу исплашена и не ми беше лесно. Знаев дека ќе можам да се вратам, но првата мисла ми беше: ’Боже, нема да играм тенис повторно’. Благослов е да имаш деца, но уште ја сакав мојата кариера и моите соништа. Знам дека многу жени нема да може да ме сфатат, но јас се чувствував многу подобро по бременоста. Физички многу сум посилна и телото ми стана подобро“, вели Азаренка во интервју за Би-би-си.

Азаренка и нејзината блиска пријателка, Серена Вилијамс, која стана мајка во 2017 година, се некои од тенисерките што поведоа кампања за тие што ќе отидат на породилно отсуство да имаат заштитен рејтинг на ВТА-листата. По ова, ВТА ги смени правилата на почетокот на 2019, со што новите мајки ќе имаат право да влезат на 12 турнири во следните три години со својот претходен рејтинг за да избегнат носителки во првото коло.

„Имавме моќ да ги смениме правилата и ако не ме паметат по гренд слем титулите, тогаш нека ме паметат по тоа – дека се борев за жените да имаат поголеми права“, изјави 29-годишната Азаренка.

Можноста Фернандо Алонсо да ја оствари тројната круна во мотоспортот ќе мора да почека барем една година кога двократниот Формула 1-шампион не успеа да се квалификува за Индијанаполис 500 трката на таканаречениот бамп-ден на славната американска патека.

Алонсо успеа да постигне само четврто најдобро време од шесте возачи што се бореа за последните три позиции на стартот и Шпанецот со Мекларен останува без трка кога Кајл Кајзер, последниот возач на патеката, успеа да го победи.

Ова е засрамувачка случка за Мекларен откако тимот се мачеше со постојани проблеми со болидот и едноставно не беа доволно брзи за настап.

„Квалификациите беа навистина долги, речиси 56 часа од вчераутро. Вчера, бевме 31. наместо 30., денеска 34. наместо 33., така што навистина немавме среќа. Разочаран сум што нема да возам следната недела. Му благодарам на тимот и сега ќе ја гледаме трката на ТВ, за жал“, изјави Алонсо.

Французинот Симон Пажено ќе го стартува 103. издание на Индијанаполис 500 од пол-позицијата. Трката се одржува следната недела во 17 часот.