Спорт
ЛШ: Ливерпул го прави невозможното во фудбалот! Нокаут за Барса и големо финале (видео)
Ливерпул уште еднаш покажа дека е „мајстор“ за пресврти во Лигата на шампионите, откако успеа со неверојатни 4:0 да ја победи Барселона и да ја надополни негативата од 0:3 од првиот натпревар за вторпат едноподруго да играат во големото финале.
Иако никој не им даваше шанси против каталонскиот гигант по високиот гостински пораз, но и поради отсуството на Роберто Фирмино и Мо Салах, „црвените“ благодарение на двата гола на Дивок Ориги и двата на Георгинио Вајналдум стигна до историска победа на „Енфилд“, во меч кој потсетуваше на веќе легендарното финале од Истанбул од 2005, кога Ливерпул се врати од 3:0 негатива на полувреме против Милан да ја крене титулата.
За Барселона, пак, која веќе ја запечати домашната титула, ова е втора шокантна елиминација во ЛШ, откако минатата година заминаа со 4:1 предност кај Рома, и беа елиминирани. Ернесто Валверде можеби е „мајстор“ за домашни титули, но за шестата европска титула на Барса е потребно нешто повеќе.
Мечот започна како што посакуваа „црвените“, откако Дивок Ориги, фудбалерот кој им донесе победа против Њукасл во текот на викендот, успеа уште во седмата минута да го совлада Марк-Андре Тер Штеген, но до полувремето не беа искористени шансите на двете страни во интересниот меч.
Во второто полувреме, „приказната“ беше поинаква и на сцена стапи Георгинијо Вајналдум, кој во 54. и 57. минута ги „замолче“ Каталонците со два брзи гола, по што вкупниот резултат беше 3:3 и сите очекуваа продолженија и потоа и пенали…
Меѓутоа, така не мислеше Трент Александер-Арнолд. Во 79. минута, кога беше досуден корнер за англискиот клуб, а фудбалерите на Барселона уште се „местеа“, Александер-Арнолд забележа дека Ориги е сам во шестнаесетникот и го изведе корнерот за гол и делириум на „Енфилд“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.