Тајсон Фјури вели дека ќе „тргне понатаму“ доколку не слушне ништо за потенцијален договор за меч за обединување на титулите со Ентони Џошуа, уште еднаш искажувајќи ја фрустрацијата од преговорите на двајцата боксери.

Преговорите траат веќе неколку недели и иако од кампот на Џошуа најавуваа дека наскоро ќе имаме официјална потврда, „Џипси кинг“ изјави дека ќе планира други мечеви ако нема договор до утре.

„Ако не слушнам ништо до вторник, ќе тргнам понатаму, бидејќи мислам дека помина долго време. Видеото дека имам договор со Џошуа го објавив во јуни минатата година. Се согласивме дека ќе боксуваме, а сега нема ништо“, вели Фјури.

Заканата како да „проработе“, откако агентот на Џошуа, Еди Херн изјави дека и неговиот боксер е очаен за меч. Џошуа, пак, на социјалните мрежи објави дека има „позитивни вести вечерва“ и дека ќе почне да се подготвува за меч.

Се тврди дека првиот од двата меча ќе се оддржи во Саудиска Арабија на 24 јули, но сепак, ќе почекаме за каква било официјална вест.

Барселона го претекна вечниот ривал Реал Мадрид како највреден клуб на светот на годишната листа која ја објавува магазинот „Форбс“, додека Манчестер јунајтед го загуби третото место од европскиот и светски шампион Баерн Минхен.

Каталонците, кои се мачат со својот огромен долг од над милијарда евра, според „Форбс“ вредат фантастични 4.76 милијарди долари, за 10 милиони повреден од Реал Мадрид, додека Баерн сега се трети со 4.22 милијарди долари вредност.

И покрај тоа што шпанските гиганти постојано се највредните на светот, зачудува што во топ 10 има дури шест премиерлигаши. Покрај Манчестер јунајтед, сега четврти, тука се и Ливерпул, Манчестер сити, Челси, Арсенал и Тотенхем, покажувајќ дека не се потребни титули за да се заработуваат многу пари во фудбалот.

ФОРБС ЛИСТА НА НАЈВРЕДНИ ФУДБАЛСКИ КЛУБОВИ

1.Барселона 4.76 милијарди $

2.Реал Мадрид 4.75 милијарди $

3.Баерн Минхен 4.22 милијарди $

4.Манчестер јунајтед 4.2 милијарди $

5.Ливерпул 4.1 милијарди $

6.Манчестер сити 4 милијарди $

7.Челси 3.2 милијарди $

8.Арсенал 2.8 милијарди $

9.Пари Сен-Жермен 2.5 милијарди $

10.Тотенхем 2.3 милијарди $

Светскиот рекет број 2, Русинот Данил Медведев вели дека е бизарна одлуката да се одложи стартот на Франција опен една недела, велејќи дека тоа нема да има никаква врска во земјата која е погодена од „третиот бран“ на корона вирусот.

Франција по третпат воведе „локдаун“ минатата недела во обид да се намали бројот на заразени, со полициски час од 19 часот до 6 часот наутро, по што организаторите на Ролан Гарос, Француската тениска федерација (ФФТ) го одложи турнирот за една недела со старт на 30 мај.

„Навистина сум изненаден. Каква врска има ако играме една недела подоцна. Ти дава чувство дека за една недела ќе исчезне КОВИД. Не сум сигурен дека нешто ќе се смени и навистина е смешно. Не ја критикувам федерацијата, туку самата ситуација“, вели Медведев.