Роџер Федерер го преживеа дуелот со Тенис Сандгрен и се пласираше во полуфиналето на Австралија опен. Швајцарецот на теренот мина три и пол часа, спаси седум меч топки и на крајот победи 6/3, 2/6, 2/6, 7/6, 6/3.

Играчот со најмногу гренд-слем титули лесно го доби првиот сет со 6/3 за 35 минути игра. Вториот и третиот сет во целост му припаднаа на Сандгрен, кој „леташе“ по теренот и направи пресврт.

Драмата што го реши победникот се одвиваше во четвртиот сет. Сандгрен при резултат 5:4 не искористи три меч-топки, а потоа во тај-брејкот не успеа да реализира уште четири топки за победа.

Тај-брејкот во четвртиот сет му припадна на Федерер со 10:8.

Петтиот сет го реши еден брејк, него во шестиот гем го направи Федерер.

Швајцарецот во полуфиналето ќе игра против победникот од мечот помеѓу бранителот на титулата Новак Ѓоковиќ и Милош Раониќ.

Фудбалскиот клуб Реал Мадрид не го дозволил трансферот на Дани Себалјос во Валенсија, објавија шпанските медиуми. Себалјос е незадоволен од статусот што го има во Арсенал, побарал од Реал да му најде нов клуб.

Валенсија покажала најмногу интерес за повремениот шпански репрезентативец, меѓутоа Реал нема да го дозволи овој трансфер. „Кралевите“ не сакале да засилат директен конкурент за титулата во Шпанја.

Себалјос оваа сезона има одиграно само девет натпревари за Арсенал, еден период беше повреден, но откако се врати во тимот, кај новиот тренер Микел Артета, не одиграл ниту една минута.

Градското дерби во НБА-лигата помеѓу ЛА Лејкерс и ЛА Клиперс што требаше да се одигра утре од 4 часот по средноевропско време е одложено поради смртта на Коби Брајант. Лејкерси побарале од лигата да го одложи натпреварот.

Легендарниот Коби Брајант настрада во хеликоптерска несреќа во неделата во 10 часот по локално време. Заедно со него загинаа уште осум други лица, меѓу кои и неговата 13-годишна ќерка Џијана.

Коби за 20 години со ЛА Лејкерс освои пет шампионски титули, двапати бил МВП на финалните натпревари, а еднаш МВП на регуларниот дел од сезоната. Со репрезентацијата на САД двапати бил олимписки шампион.

Лејкерси во моментов се лидери во Западната конференција со скор 36/10, додека Клиперси се трети со скор 33/14.