Селекторот на фудбалската селекција на Хрватска, Златко Далиќ останува на клупата на „коцкастите“. Иако неговиот договор истече минатиот месец и делуваше дека сака да ја напушти хрватската фудбалска селекција, сепак светскиот вицешампион од Русија и наредните две години останува на клупата на Хрватска.

Далиќ добиваше милионски понуди од азијски репрезентации, но на крајот се одлучи за татковината.

До крајот на овој месец се очекува официјалното продолжување на договорот. Ако нема промени во меѓувреме, тој ќе биде на кормилото на „коцкастите“ и на ЕП во 2021 година, но и на СП во Катар 2022 година, секако доколку Хрватска обезбеди пласман.

Златко Далиќ и понатаму ќе има годишна плата од 1.5 милиони евра, информираат хрватските медиуми.

На 30 натпревари како селектор на Хрватска, има 18 победи, 5 нерешени и 7 порази.

Светската ракометната федерација (ИХФ) ги додели двете вајлд карти за Светското првенство што идната година во јануари ќе се одржи во Египет, но Македонија не е меѓу среќниците. Привилегирано учество на Мундијалот ќе има за Полска, односно за Русија.

Иако Македонија, според резултатите од последниот европски шампион, беше најблиску до вајлд картата, сепак челниците на светскиот ракомет не мислеа така.

„ИХФ доби апликации за вајлд-карта од неколку федерации. При решавање и носење на одлука во целиот процес земени беа предвид генералниот развој на ракометот во конкретната земја, глобалниот ефект врз ракометот кој би го имало доделувањето на вајлд-карта на конкретната земја, но исто така и економските причини, особено во време на Ковид-19“ – велат од ИХФ.

Полска на последното ЕП заврши на 21 место, а Русија беше една позиција зад нив.

Иако во Македонија ракометот е спорт број 1, сепак ИХФ бара „голем пазар“, а нашата земја не е тоа.

Македонија ќе пропушти Мундијал првпат по цели 10 години. Последен пат отсуствувавме од СП во Шведска, во 2011 година.

Крилниот кошаркар на Лос Анџелес Клиперс, Каваи Ленард не отпатува со екипата во Орландо каде на крајот на месецов ќе се продолжи сезоната во НБА лигата.

Како што пренесува „ЕСПН“, Ленард на Флорида не отишол од семејни причини, а се очекува на Клиперси да им се придружи за неколку дена.

Ленард до прекинот на сеозната во март годинава имаше учинок од приближно 27 поени, 7 скока и 5 асистенции на меч, па тој е најзаслужниот што ЛА Клиперс се втори на Западот со скор 44-20, веднаш за градскиот ривал Лејкерс кој има 49-14.

Со дуелот меѓу овие две екипи ќе продолжи сезоната која беше прекината поради пандемијата на коронавирусот.