Поранешниот капитен на Манчестер Сити, голманот Џо Харт не го криеше воодушевувањето откако „граѓаните изборија пласман во големото финале на Лигата на шампионите што годинава ќе се одигра во Истанбул.

„Ова е голем момент за клубот. Луѓето велат дека овој клуб нема иднина во европски рамки, но секако има душа. Многу луѓе поминаа низ клубот во минатото, имаше добри и лоши моменти, но останаа заедно. Тоа е долг процес и среќен сум поради нив, но и поради навивачите со кои сум многу близок. Ништо се уште не е готово, ова не е клуб што само сака да влезе во финалето, туку сака и да го освои“ рече Харт.

Чуварот на мрежата и на „Гордиот Албион“ во Сити дојде како 19-годишник во 2006 година. Дел од екипата беше се до 2018 година, со 348 настапи во синиот дрес. Во моментов е резервен голман во Тотенхем.

„Кога дојдов во 2006 година целта на Сити беше само да заврши во горниот дел од табеата, но тогаш се случи промената на сопственикот, дојде групација од Абу Даби и видовме дека се подготвуваат големи работи. Изградија цврсти темели и го надоградија духот на Манчестер Сити“ заклучи Џо Харт.

„Граѓаните“ на Гвардиола вечерва ќе го дознаат противникот во финалето – Челси или Реал Мадрид.

За Манчестер Сити тоа ќе е прво финале во ЛШ, но и прво европско финале уште од далечната 1970 година кога Сити го освои тогашниот Куп на победници на купови (денешна Лига Европа).

Еден од сериозните кандидати за МВП оваа сезона во НБА-лигата – Србинот Никола Јокиќ – чувствува болка во палецот на десната нога, па во прашање е неговото учество во вечерашниот дуел на неговиот клуб Денвер Нагетс против Њујорк Никс.

Иако тренерот на Нагетси и порано истакнуваше дека разговарал со српскиот интернационалец за негова пауза поради одмор, сепак српскиот центар инсистирал да игра.

Интересно е дека Јокиќ одиграл 173 натпревари без пауза во низа, а последниот меч што го пропуштил е оној од 7 април 2019 година.

Денвер има доста проблеми со повредени играчи, Џемал Мареј ја заврши сезоната кога ги скина лигаментите на коленото, а помали повреди имаат и Монте Морис и Пи Џеј Дозир.

За потсетување, Денвер веќе обезбеди плејоф во НБА-лигата.

Тренерот на Манчестер јунајтед, Оле Гунар Солскјер, ги коментира протестите пред „Олд Трафорд“ поради кои беше одложено дербито со Ливерпул. Истакна дека го почитува мислењето на навивачите, но смета дека сепак овој пат ситуацијата излезе од контрола.

„Мора да го чуеме гласот на навивачите, сите имаат право да учествуваат, но на цивилизиран начин. Кога насилно ќе влезете во стадионот и кога ќе повредите полицајци, тоа е премногу. Кога работите ќе излезат од контрола – тоа е казниво дело и веќе нема врска со изразувањето на мислењето“, рече Норвежанецот.

Фановите на „црвените ѓаволи“ бараат сопствениците на клубот – семејството Глејзер – да си одат од Јунајтед, но Американците сакаат да останат и да го подобрат односот со навивачите.

„Не треба да се биде паметен за да се види дека имаме предизвици што мораме да ги решиме. Веќе почнавме комуникација со навивачите, што ќе биде голем чекор напред во иднина. Мора да сме обединети“, вели Солскјер.

Сѐ уште не е познато кога ќе се одигра одложениот меч со Ливерпул, но затоа утре Манчестер во Рим ќе ги одмери силите против Рома во реванш-полуфиналниот дуел од ЛЕ.

Момците на Солскјер со една нога се на финалето во Гдањск затоа што во првиот меч победија со убедливи 6-2.

Јунајтед нема трофеј откако норвешкиот стратег е на кормилото – од крајот на 2018 година.