Спорт
Мурињо: Манчестер Јунајтед за мене е затворено поглавје

Жозе Мурињо, во среда, ќе се врати на „Олд Трафорд“ како тренер на противнички тим. Мурињо пред една година доби отказ од Манчестер Јунајтед. Португалецот во пресрет на натпреварот зборува за периодот што го минал во Јунајтед.
„Јунајтед е затворено поглавје за мене. Заминав од клубот и ми требаше многу време за да сфатам што се случи. Се подготвив за нов предизвик, Јунајтед е сега во мојата книга по историја. Ви се однесувате како вчера да заминав од Јунајтед, но не е така, мина речиси цела година. Сега сум во Тотенхем, па доколку сакате да разговараме за Јунајтед, тогаш да разговараме за нашиот противник“, рекол Мурињо.
Португалецот не сакал да ја коментира работата на Оле Гунар Солскјер, само рекол дека Јунајтед можат да остварат некоја од зацртаните цели иако за нив сезоната досега е лоша.
„Има работи што можат да ги направат оваа сезона. Можат да ја освојат Лига Европа. Можат да го освојат Лига купот, можат да го освојат ФА купот иако за противници ги имаат Вувлерхемптон. Можат да остварат некоја цел“.
Ерата на Мурињо во Тотенхем започна добро, со победи над Вест Хем, Олимпијакос и Борнмут.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Синер повторно го ангажира тренерот од аферата „Клостебол“

Светскиот број 1, Италијанецот Јаник Синер, повторно го ангажираше својот поранешен тренер за физичка подготовка, Умберто Ферара. Минатата година, Синер се раздели со Ферара и физиотерапевтот Џакомо Налди откако против него беше покрената истрага за земање на забранетиот лек, клостебол, што резултираше со негова тримесечна суспензија по спогодбата со Светската антидопинг агенција (WADA).
Толку блага казна беше изречена бидејќи беше утврдено дека забранетата супстанца влегла во телото на Синер затоа што Налди користел спреј што содржи клостебол за посекотините на раката, кој Ферера му го дал, а потоа го масирал Синер.
„Умберто одигра важна улога во развојот на Јаник и неговото враќање го покажува неговиот фокус на продолжување на играњето на највисоко ниво“, објави таборот на Синер.
Откако се раздели со Синер, Ферара работеше со друг италијански тенисер, Матео Беретини, во првата половина од оваа година.
Инаку, пред Вимблдон, Синер се раздели со фитнес тренерот Марко Паники и физиотерапевтот Улисес Бадија. Точната причина не беше наведена, но се шпекулираше дека станува збор за пари.
Фото/ Принскрин
Спорт
Рубен Гарабаја ќе го предводи Еурофарм Пелистер

Еурофарм Пелистер има нов тренер. Откако спогодбено се раздели со тренерот Раул Алонсо, кој ја освои титулата со клубот од Битола, клубот на неговото место го донесе Рубен Гарабаја Аренас.
Гарабаја има 46 години и полна витрина медали и одличја од богатата играчка кариера. Играше 168 пати за шпанската репрезентација на позиција кружен напаѓач, постигна 318 гола и освои светска титула во Тунис 2005 година, сребро од Европскиот шампионат во Швајцарија следната година, бронза од Олимписките игри во Пекинг во 2008 година и Мундијалот во Шведска во 2011 година.
Рубен Гарабаја доаѓа од покраината Астурија, кариерата ја започна во Адемар Леон (освои Куп на Кралот и ЕХФ Куп на Купови), играше за Фригорификос де Моразо и Ваљадолид, за 2007 година да го облече дресот на Барселона.
Со Барса освои три АСОБАЛ лиги, два Купа на Кралот, а играше и во финалето на Лигата на шампионите во сезоната 2009/10.
Од 2010 до 2018 година настапуваше за Натухаус Ла Риоха од Логроњо, клуб во кој ја заврши играчката и ја започна тренерската кариера.
Гарабаја со тренерската работа започна да се занимава во Логроњо како асистент тренер во 2018 година. Три години остана во Натурхаус Ла Риоха и го прифати првиот меѓународен предизвик како селектор на женската репрезентација на Кина.
Во 2021 година на покана на Роберто Гарсија Парондо (поранешен тренер на Вардар) стана асистент тренер во египетската репрезентација. Во овој период од две години освојува злато од шампионатот на Африка и сребро од Медитеранските игри.
Во 2022 година почнува самостојна тренерска кариера во шпанскиот клуб Синфин Сантандер, каде што работеше се до повикот од Битола.
Извор/ РК Еурофарм Пелистер
Спорт
Албанија казнета за инцидентите на мечот со Србија

Светската фудбалска федерација (ФИФА), го казни Фудбалскиот сојуз на Албанија по натпреварот против Србија, одигран на 7 јуни во Тирана, во рамките на квалификациите за пласман на Светското првенство.
ФИФА ги информираше Албанците дека мора да платат 173.000 евра поради инцидентите што ги предизвикаа навивачите на споменатиот натпревар.
Причината се навредите кон Србите, како и фрлањето предмети, со кои беа погодени неколку српски репрезентативци.
„Оваа казна е последица на повтореното несоодветно и пристрасно однесување на некои албански навивачи: песни со пристрасна содржина, фрлање предмети, палење пиротехника, упатени пораки несоодветни за спортски настан и прекини за време на изведувањето на националните химни“, се наведува во соопштението.
Покрај паричната казна, 20 проценти од капацитетот на стадионот ќе бидат затворени за натпреварот со Латвија.
Фото/ Принтскрин