Спорт
Мурињо: Мојот Интер беше „најголемиот“ во историјата
Жозе Мурињо признава дека му било тешко да си замине од Интер во Реал Мадрид, а додава дека го користел „егото“ на Луис ван Гал да ги победи Баерн Минхен.
Португалецот имаше историски успех со „нераѕурите“ кога во 2010 година ја освои тројната круна – Лигата на шампионите, скудерото и Копа Италија. Финалето во 2010, во кое тој го совлада Баерн Минхен, се играше во Мадрид, а тој веќе имаше договор со Реал.
„Морам да признаам нешто што досега не сум го кажал. Причината поради која не се вратив во Милано по тоа финале е бидејќи ако дојдев таму никогаш немаше да заминам за Реал Мадрид. Сакав да избегам од емоциите, воопшто не се симнав ниту во соблекувалната бидејќи немаше да се контролирам. Веќе направив одлука да одам во Реал, иако немав договор. Да се вратев во Милано за прославата ќе се предомислев. Ми недостасува тоа време. Освоивме три титули за 15 дена, а Диего Милито постигна четири гола. Тоа беше историски успех“, вели Мурињо.
Околу финалето, тој вели дека добро го проценил тогашниот тренер на Баерн, Луис ван Гал.
„Го познавав Ван Гал, знаев дека неговото его ќе биде предност за мене. Финалето беше освоено пред да излеземе на теренот. Направивме нешто уникатно и потоа се создаде вечната врска со овој клуб и оваа земја. Интер во 2010 не беа само најголемиот Интер во историјата, туку и тим со најголем успех во италијанскиот фудбал. Тие фудбалери се икони“, објаснува Португалецот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.