Спорт
МЗТ се засилија со Американецот Гравет

Американскиот кошаркар Хасани Гравет (24 год, 188 см) е најновото засилување на МЗТ Скопје Аеродром за новата сезона. Гравет денеска потпиша едногодишен договор со МЗТ.
Плејмејкерот пред една година потпиша договор со НБА-екипата на Орландо Меџик, за која, сепак, не заигра, со оглед што беше префрлен во филијалата на овој тим во Џи-лигата, Лејкленд Меџик.
Во втората по квалитет професионална лига во САД, Гравет просечно реализираше 11,7 поени со 4,1 скок и 3,4 асистенции.
Претходно, универзитетската кариера ја почнува во Пенсакола стејт, од каде што по една година преминува во Јужна Каролина, со која веќе во првата сезона доаѓа до фајналфор-турнирот во престижната НЦАА-лига.
Гравет е второто странско засилување за МЗТ во пресрет на новата сезона, по продолжувањето на договорот со Феми Олуџоби.
Тренерот Ѓорѓи Кочов во моментов на располагање има и шест македонски репрезентативци и тоа Дамјан Стојановски, Андреј Магдевски, Андреј Маслинко, Бојан Крстевски, Адем Мекиќ и Филип Бакоч.
извор/mztskopjeaerodrom.mk
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Иниго Мартинез се сели во Ал Наср

Дефанзивецот на Барселона Иниго Мартинез кариерата ќе ја продолжи во Саудиска Арабија. Повремениот репрезентативец на Шпанија постигнал договор со Ал Наср.
Барселона нема да добие ниту цент од трансферот, тврди новинарот Фабрицио Романо. Искусниот стопер активирал посебна клаузула во договорот за да го напушти клубот. Сепак, Барса ќе заштеди на неговата плата и ќе добие простор за маневрирање за понатамошна регистрација на фудбалери.
Клубот нема да бара нов дефанзивец на трансфер пазарот. Тоа неодамна го потврди и спортскиот директор Деко.
„Имаме пет централни дефанзивци, еден мора да си замине“, рече Деко за „Мундо Депортиво“.
Барселона останува со четири централни дефанзивци: Пау Кубарси, Роналдо Араухо, Андреас Кристенсен и Ерик Гарсија, додека Жил Кунде првенствено се смета за десен бек. Покрај тоа, тренерот Ханси Флик веќе го проба младиот Жерар Мартин на позицијата лев стопер во предсезоната.
Спорт
Судот постави строги правила: Парти и официјално во Виљареал

Томас Парти и официјално е фудбалер на Виљареал.
32-годишниот интернационалец од Гана не го обнови договорот со Арсенал ова лето, а само четири дена по истекот на договорот, доби тужба за пет силувања поднесени од две жени и тужба за сексуален напад поднесена од трета девојка.
Парти ги негира сите обвинувања, а во средата беше сослушан на суд и доби условна кауција, му беше дадена и дозвола да ја напушти земјата, што му овозможи да потпише едногодишен договор со Виљареал.
Според условите што ги постави судот, Парти не смее да контактира со ниту една од трите жени, мора да пријави каква било промена на адресата во полицијата и мора редовно да одговара на судските покани за сослушувања.
Следното е закажано за 2 септември. По потпишувањето и официјалната дозвола за патување во Шпанија, неговиот нов работодавач, Виљареал, исто така, се огласи.
„Клубот е свесен дека играчот во моментов е вклучен во правен процес во Англија. Клубот го почитува основниот принцип дека секој е невин додека не се докаже дека е виновен, судот е тој што ќе го разјасни овој случај.“
Исто така, поради законот во Англија, клубот нема да дава дополнителни коментари за случајот“, кратко и јасно објави Виљареал.
Тие додадоа дека се против сите форми на насилство, дискриминација, расизам, ксенофобија…
Спорт
Јунајтед и Лајпциг го договориле трансферот на Шешко

Бенјамин Шешко (22) наскоро ќе стане нов играч на Манчестер јунајтед, објави попладнево Фабрицио Романо. Најпознатиот светски експерт за трансфери на фудбалери ги објави деталите за трансферот. Јунајтед ќе плати 76,5 милиони евра фиксна отштета на германскиот РБ Лајпциг за словенечкиот напаѓач, со 8,5 милиони потенцијални бонуси.
Вечерва, Шешко ќе отпатува за Англија во друштво на своите менаџери, каде што треба да ги мине лекарски прегледи и да го потпише договорот утре.
Словенецот ќе потпише договор до 2030 година, а износот на платата што ќе ја заработува сè уште не е познат.
Шешко, инатата сезона постигна 21 гол за германскиот бундеслигаш на 45 настапи, вклучувајќи четири гола во Лигата на шампионите. Тој веќе има 41 настап за словенечката репрезентација и постигнато 16 гола.
Да ве потсетиме, Рубен Аморим и Јунајтед веќе некое време составуваат нов напад на „Олд Трафорд“. Претходно во овој преоден рок пристигнаа Брајан Мбеумо од Брентфорд и Матеус Куња од Вулверхемптон, секој за 75 милиони евра отштета. Вкупно, Јунајтед инвестираше околу 225 милиони евра во формирање на ново напаѓачко трио.