Кошаркарите на Лос Анџелес Клиперс со резултат 106-92 славеа на ноќешниот трет дуел против Феникс Санс во финалето на Западната конференција во НБА лигата.

Клиперси ги загубија двата претходни меча од „сонцата“, но пред својата публика се „разбудија“ и ја вратија неизвесноста во серијата.

Отсуството на Каваи Ленард го надополни Пол Џорџ кој мечот го заврши со 27 поени, 15 скока и 8 асистенции. Сјаен во тимот беше и Хрватот Ивица Зубац со 15 поени и 16 скока, додека Реџи Џексон мечот го заврши со 23 поени.

На другата страна – Ејтон имаше ефект од 18 поени и 9 скока, а Дејвин Букер, кој играше со заштитна маска поради повреда на носот уфрли 15 поени. Толку имаше и повратникот во екипата, Крис Пол, надополнето со 12 асистенции.

Четвртиот меч од финалето на Западот се игра исто така во Лос Анџелес, во недела наутро во 3 часот.

На крилата на Мигел Алмирон кој забележа гол и асистенција, селекцијата на Парагвај синоќа го совлада составот на Чиле со 2-0 и го потврди учеството во плеј-офот на Копа Америка.

Со втората победа во третото коло Парагвајците стигнаа до место меѓу осумте најдобри од групата А.

Парагвај до водство стигна во 33 минута кога Самудо го материјализираше центаршутот на Алмирон, па го матираше голманот Клаудио Браво.

Сакајќи да ја стигне предноста на противникот, Чиле отворено го започна вториот дел, но во 58 минута „го плати цехот“ за тоа. Алмирон го зголеми водството на 2-0.

До крајот на мечот имаше неколку шанси за промена на резултатот, но мечот заврши 2-0 за Парагвај.

Во вториот синоќешен меч Уругвај предводен од Луис Суарез и Едисон Кавани лесно и рутинирано со 2-0 ја совлада последнопласираната селекција во групата А на Копа Америка – Боливија. Уругвајците конечно се разбудија и заиграа онака како што од нив се очекува.

Првиот гол на мечот беше дело на Боливијците. Стоперот и голманот кумуваа за автогол за својата селекција во 40 минута.

Сите дилеми околу прашањето на победникот ги реши „Ел Матадор“ со погодокот во 79 минута.

Со победата Уругвај обезбеди место во плеј-офот.

Капитенот на македонската фудбалска репрезентација – Горан Пандев (37) на ЕУРО 2020 ја заврши репрезентативната кариера.

Тој во неколку наврати нагласи дека најпрво ќе се одмори, а потоа ќе ја донесе одлуката дали ќе ги „закачи копачките“ и ќе заврши со професионалниот фудбал.

Во меѓувреме, италијанските медиуми пишуваат дека Џенова му нуди нов договор на Македонецот со важност до 2022 година. Неговиот актуелен договор со клубот од југот на Италија истекува на 30. овој месец.

Тренерот на клубот, Давиде Балардини инсистира Пандев да ја продолжи кариерата, но одлуката ќе ја донесе струмичанецот штом спаднат впечатоците од ЕП.

Минатата сезона Горан Пандев постигна 7 гола на 29 натпревари за Џенова – тимот во кој настапува од 2015 година и за кој вкупно има постигнато 28 гола на 156 меча.

TMW, il Genoa ha presentato un contratto annuale a Pandev – https://t.co/Kytr28yXbS pic.twitter.com/1r8ggUSf8c

— pianetagenoa1893.net (@pianetagenoa) June 24, 2021