Спорт
Нејмар признава дека можел да биде играч на Реал Мадрид
Ѕвездата на Пари Сен-Жермен, Нејмар потврди дека требало да потпише за Реал Мадрид кога бил тинејџер, но одлучил да ја отфрли понудата откако му недостасувал домот.
Нејмар ја почна кариерата во бразилскиот Сантос, пред да замине за Барселона каде што освои трофеј од Ла лига и Лигата на шампионите покрај Лионел Меси и Луис Суарез, пред ПСЖ да платат рекордни 222 милиони евра за него во 2017 година.
„Кога имав 10 години, Реал Мадрид ме поканија на проба. Бев воодушевен, многу среќен, бев со нив на тренинг. Тоа беше во ерата на ‘Галактикосите’. Мислам дека гледав еден меч и сите голови беа дадени од Бразилци – два од Роналдо, еден од Робињо и гол од слободен удар од Жулио Баптиста и уште еден од Роберто Карлос. По мечот се фотографирав со нив. Останав таму една недела, но потоа сакав да се вратам дома во Бразил“, открива Нејмар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Славеничка победа против Динамо Букурешт: Пелистер прослави 80 години постоење

Фудбалскиот клуб Пелистер на најдобар можен начин го одбележа големиот јубилеј – 80 години од своето постоење. На стадионот „Петар Милошевски“ во Битола, „зелено-белите“ славеа со 2-0 против реномираниот романски клуб Динамо Букурешт во пријателски натпревар исполнет со одлична атмосфера.
По израмнето прво полувреме, домашниот состав беше поагилен во продолжението и искористи една грешка на гостите. Во 75. минута, дефанзивецот Тоадер несреќно си постигна автогол, со што Пелистер поведе со 1-0.
Во завршните минути, капитенот Александар Ристевски беше прецизен од белата точка и го постави конечниот резултат 2-0, со што беше заверена славеничката победа.
Јубилејот го следеа бројни навивачи, тука беа и популарните „Чкембари“ кои исто така слават 40 години постоењето, имаше богата програма, а Пелистер со оваа победа уште еднаш потсети дека традицијата и љубовта кон фудбалот во Битола живеат и по осум децении.
Спорт
Мегваер одбива половина милион евра неделно, само за да остане во Јунајтед

Дефанзивецот на Манчестер Јунајтед, Хари Мегваер, е подготвен да одбие фантастична сума од Саудиска Арабија, бидејќи сака да остане во тимот од Олд Трафорд, но има еден услов.
Мегваер ќе одбие неделна плата од половина милион евра, односно 25 милиони евра годишно од Саудиска Арабија. Сепак, треба да се нагласи дека тој ќе го стори тоа само ако клубот му понуди гаранции и нов договор.
Мегваер е мета на клубови од Саудиската професионална лига, Ал-Наср и Ал-Етифак, кои се подготвени да му понудат највисока плата во светот за стопер. Договорот на поранешниот капитен на Јунајтед истекува во јуни, а веќе во јануари ќе може слободно да преговара со други клубови.
Мегваер се пресели од Лестер во Јунајтед во 2019 година за тогаш неверојатни 80 милиони евра, со што ја доби титулата најскап дефанзивец во светот.
Во овие шест години, тој често правеше катастрофални грешки, а противничките навивачи во Англија „често“ го потсетуваат на тоа со наменски песни.
Спорт
На Мбапе му недостигаат пет гола за да урне два неверојатни рекорди

Килијан Мбапе продолжува да го пишува своето име во историјата на фудбалот. Францускиот ас блеска и оваа сезона во дресот на Реал Мадрид, а за време на репрезентативната пауза постигна гол во победата на Франција над Азербејџан со 3-0.
Со овој погодок, Мбапе стигна до бројката од 53 гола за репрезентацијата, и сега му недостигаат само пет за да го престигне Оливие Жиру (57) и да стане најдобар стрелец во историјата на Франција.
Но тоа не е единствениот рекорд што го брка. Капитенот на „триколорите“ има 12 гола на Светските првенства и е на чекор од историја – само пет му недостигаат за да го престигне Германецот Мирослав Клосе, кој со 16 погодоци е најдобриот стрелец во историјата на Мундијалите.
Од активните фудбалери пред него е само Лионел Меси со 13 гола, но останува неизвесно дали Аргентинецот ќе игра на СП 2026.
Ако Мбапе го задржи сегашниот ритам, Мундијалот во САД, Канада и Мексико може да биде местото каде што ќе испише нова страница во фудбалската историја.