Спорт
Нема „стој“ за Вардар – победа над Војводина еден ден по меч од ЛШ!

Само 24 часа по важниот дуел од ЕХФ Лигата на шампионите, ракометарите на Вардар мораа да ја „одработат“ задачата и во СЕХА-лигата, пречекувајќи го во Скопје, српскиот тим на Војводина за да стигнат до својата петта победа во шест меча во регионалното натпреварување, овојпат со 26:23 (11:11) обезбедена во последните минути од мечот.
Неверојатниот распоред на натпреварувањата, го примора тренерот Едуард Кокшаров да калкулира со своите ракометари и во исто време да не го намали значењето на СЕХА-лигата, како што прават некои други клубови, како Веспрем.
Мечот започна доста израмнето, и дури по 20-тата минута од првото полувреме, Вардар успеа да се одвои на четири гола разлика (10:6), но гостите успеаја на полувремето да извлечат нерешен резултат (11:11).
И во второто полувреме, Вардар не успеа да се наметне и дури дозволи Војводина да води со +2 (13:15 во 36. минута од мечот), пред да направат пресврт и на 10 минути пред крајот да имаат два гола предност (22:20).
Сташ Скубе беше најефикасен за „црвено-црните“ со седум постигнати голови, шест додаде Димитар Димитриовски, додека стандардниот Иван Чупиќ уфрли пет. За гостите Страхиња Станковиќ беше најдобар стрелец со шест гола.
СЕХА ЛИГА, 6.КОЛО
Татран Прешов – Нексе 24:22 (14:12)
Вардар – Војводина 26:23 (11:11)
Фото: СЕХА лига
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Поднесена иницијатива за смена на првиот човек на Кошаркарската федерација

Во Кошаркарската федерација на Македонија, во вторникот е поднесено барање за Вонредно собрание. На Вонредното собрание ќе се гласа за смена на актуелниот претседател, Перо Антиќ.
Иницијаторите за смена на актуелното раководство на Федерацијата се обидоа да му изгласат недоверба на Антиќ во декември минатата година, но тогаш најде „дупка“ во праилникот и си купи уште неколку месеци на функцијата.
Иницијативата за смена на Антиќ ја поднел поранешниот репрезентативец Младен Ѓуровски. Тој има поддршка од 37 членки на Собранието.
Кошаркарската федерација на Македонија мора во рок од две недели да го закаже Вонредното собрание, доколју тоа не се случи инцијаторите имаат право сами да го организираат.
Спорт
Кевин Пантер не оди никаде – Барса му дава четири милиони за сезона

Американски кошаркар со српски пасош ќе потпише нов договор со Барселона.
Веќе некое време се зборува за финансиската состојба на Барселона, буџетските промени, амбициите, намалување на платите и слично.
Токму затоа Кевин Пантер беше во јавноста, па се појавија шпекулации од намалување на платата до потенцијално заминување од шпанскиот клуб.
Како што пренесуваат добро упатените „Јурохупс“, поранешниот капитен на Партизан и член на АЕК, Црвена звезда и Олимпија Милано ќе потпише нов договор со Барселона.
Тоа ќе биде тригодишен договор вреден 12 милиони евра или четири милиони по сезона, што ќе го направи Пантера еден од најскапите играчи во европската кошарка.
Спорт
Де Роси добил повик од Премиер лигата

Вулверхемптон стапиле во контакт со италијанскиот тренер Даниеле де Роси за можноста да го преземе тимот следната сезона.
Како што пренесува „Газета дело Спорт“, Де Роси имал повеќе од една средба со клупските челници.
Инаку, Вулверхемптон веќе го смени тренерот оваа сезона. Во моментов на клупата е Португалецот Витор Переира, кој во декември го замени Гери О’Нил.
Де Роси досега во кариерата ги водеше СПАЛ и Рома, каде што ја мина својата професионална фудбалска кариера. На клупата на „Волчицата“ мина осум месеци, од 16 јануари до 18 септември 2024 година.
Доколку двте страни постигнат договор, Де Роси ќе стане вториот италијански тренер во Вулверхемптон.
Легандарниот голман Валтер Зенга го водеше клубот помалку од три месеци од 1 август до 25 октомври 2016 година.
Вулверхемптон моментално е 17-ти на табелата во Премиер лигата, прв над зоната за испаѓање, со девет бода повеќе од Ипсвич.