Спорт
Новак Ѓоковиќ вечерва го игра мечот на кариерата
Српскиот тениски ас Новак Ѓоковиќ вечерва со почеток од 22 часот по средноевропско време во Њујорк го игра најважниот меч во кариерата. Противник во големото финале на грен слем тенискиот турнир САД опен ќе му биде вториот светски тениски рекет во моментов, Данил Медведев од Русија. Тој досега во кариерата се уште нема освоено грен слем титула.
Србинот, пак, има можност да е првиот тенисер по цели 52 години кој освоил календарски грен слем – титула на сите 4 годинешни тениски турнири. Последен пат тоа му успеа на Род Лејвер во далечната 1969 година.
Вечерашниот меч е посебен за Ѓоковиќ и поради фактот што со триумф ќе им побегне на големите ривали Роџер Федерер и Рафаел Надал по бројот на грен слем титули. Тој и имал 21, а тие по 20.
„Еден меч остана, се е тука. Ќе го дадам и срцето и телото и главата. Се ќе дадам. Ќе го играм овој меч како да ми е последен во кариерата“ рече Ѓоковиќ.
Тој против Медведев има 5 победи во 8 меча.
Рускиот тенисер, пак, вели дека не го интересираат рекордите на Ѓоковиќ.
„Можеби еден ден ќе се зборува за мене како за човекот кој го запрел Ѓоковиќ, но за тоа воопшто не размислувам. Сигурно дека притисокот ќе биде врз него, но ќе има и голема мотивација, поради што ќе биде уште посилен“ смета рускиот тенисер.
Медведев во 6 меча на актуелниот САД опен загуби само еден сет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.