„Кралот“ Леброн Џејмс успеа да го помине Коби Брајант на вечната листа на стрелци во НБА лигата, преземајќи го третото место зад легендарните Карим Абдул-Џабар и Карл Мелоун.

Неговиот Лос Анџелес лејкерси загубија во Филаделфија од Сиксерси со 108:91, но 29-те поени на Џејмс беа доволни тој да го помине Коби и да има 33.643 поени во кариерата (досега). Абдул-Џабар има 36.928, додека Карл Мелоун е на 38.387.

„Среќен сум што воопшто сум во иста реченица со Коби Брајант. Тој е еден од најголемите кошаркари на сите времиња, еден од најголемите Лејкерси. Тој има два дреса кои висат во ’Стејплс центарот’. Тоа е сосема лудо“, изјави Леброн, кој ја заврши вечерта со 29 поени, 8 асистенции и 7 скока.

Самиот Брајант веднаш му честиташе на Џејмс на Твитер.

„Продолжувајќи да го движи спортот напред. Кралот Џејмс. Многу почит, брату“, напиша Брајант.

Новак Ѓоковиќ експресно влезе во четврт-финалето на Австралија опен, откако со 6:3/6:4/6:4 го „збриша“ Аргентинецот Диего Шварцман на „Род Лејвер арената“ и сега го очекува пресметка со својот стар познаник, Канаѓанецот Милош Раонич.

Србинот немаше поголеми проблеми против Шварцман во меч кој траеше нешто повеќе од два часа и по 11. пат во кариерата се пласираше меѓу осумте најдобри на Мелбурн парк. Раонич претходно со фантастичен сервис со 6:4/6:3/7:5 го победи Хрватот Марин Чилиќ.

„Диего немаше загубено сет во првите три кола и играше навистина добро. Знаев дека ако му дадам време може да наштети бидејќи е еден од најбрзите тенисери на турнејата. Сега одам на Милош, еден од најсилните и највисоките тенисери на турнејата и ќе треба да бидам подготвен за ракети од негова страна“, изјави Ѓоковиќ.

Кај дамите, Американката Софија Кенин стави крај на турнирот од соништата на тинејџерската сензација Коко Гоф, победувајќи ја со 6:7(5)/6:3/6:0 за прво гренд слем четврт-финале во кариерата.

15-годишната Гоф, која претходно ги елиминираше Венус Вилијамс и актуелната шампионка Наоми Осака, успеа да се врати од брејк-негатива да го освои првиот сет носена од поддршката на публиката, но 14. носителка Кенин успеа да се врати и да ги искористи грешките кои се нижеа за импресивна победа. Во четврт-финалето таа ќе игра со Тунижанката Онс Жабер, која со 7:6(4)/6:1 ја совлада кинеската тенисерка Ванг Кијанг.

Репрезентацијата на Норвешка го освои бронзениот медал на 14 Европско првенство во ракомет. Во „малото финале“, Норвешка со доминантна игра ја победи Словенија со 28:20. Ова е прв недал од европските првенства за Норвешка.

Норвешка собра сили, по синоќешниот шокантен пораз од Хрватска и целиот бес го истурија врз Словенците.

Словенија на овој меч само еднаш имаше предност, 2:1 на самиот почеток, останатиот дел од мечот им припадна на Норвежаните иако Словенците се држеа во првиот дел. Норвешка на полувреме имаше предност од три гола.

Во вториот дел Словенците не може да го испратат ритамот што го наметнаа Норвежаните. Предност растеше до максималните девет гола.

Мечот го обележаа голманите на двете репрезентации Бергеруд (Норвешка) и Ферлин (Словенија) со по 14 интервенции.

Најефикасни кај Норвешка беа Јондал со седум, Бјорнсен со пет, односно Сагосен и Јоханесен со четири гола. Словенија ја предводеа Бомбач со пет и Мацковшек со четири гола.

Големото финале на Европското првенсто ќе се одигра утре помеѓу Хрватска и Шпанија од 16.30 часот.

foto/epa