Вечните скопски ривали, МЗТ и работнички, попладнево, одиграа натпревар во Сараево, во АБА2 лигата. Во трилер завршница победата им припадна на кошаркарите на МЗТ со 84:82 (17:21, 24:13, 22:27, 21:21).

МЗТ ја забележаа петтата победа во осмиот меч сезонава, во АБА2 лигата, додека Работнички има скор од две победи и шест порази. На табелата МЗТ се наоѓа во групата од шест тима, кои се наредени од второто до седмото место на табелата, додека Работнички се претпоследни.

Дуелот во Сараево, беше решен во неизвесна завршница, откако Работнички во третиот период со серија од 11 поени, успеа да ја стигне предноста на МЗТ.

Драмата кулминираше во финишот кога Олуџоби го блокираше Питс при водство на Работнички 80:76, решавачкиот момент се случи кога најдобриот играч на Работнички, Питс, направи неспортски фаул врз Балмазовиќ. МЗТ од тој фаул постигна три поени и го заклучи натпреварот со 84:82.

Крстевски со 19, односно Стојановски и Бојиќ со по 14 поени го предводеа МЗТ до победата. Кај Работнички се истакнаа Питс со 20 поени, односно Младеновски со 17 поени и осум скока.



Драган Стојковиќ-Пикси официјално е менуван за селектор на фудбалската репрезентација на Србија. Пикси потпишал три годишен договор, треба да ја предводи Србија до крајот на квалификацискиот циклус за пласман на Европското првенство во 2024 година.

Легендарниот фудбалер, денес го слави 56 роденден и на промоцијата реколд дека подобар подарок не можел да добие.

„Знам каква е одговорноста, но во исто време верувам во мојот и во квалитетите на моите соработници. Верувам и во големиот потенцијал со кој располага репрезентацијата. Исто така ја чувствувам поддршката и од јавноста, која ќе ни биде потребна за да ги оствариме нашите цели. Квалификациите ќе започнат за три недели, започнавме со подготовките, ги анализираме противниците. Првите два противника се исклучително тешки, реално тие се нашите главни ривали за првите две места во групата“, рекол Стојковиќ.

Поранешниот тренер на Нагоја и Гвангжу, ќе дебитира на 24.март против Република Ирска, три дена подоцна Србија ќе игра против Португалија, а на 30.март ќе гостува во Азербејџан.

Пикси на селекторската функција го наследи Љубиша Тумбаковиќ, кој доби отказ откако не успеа да избори пласман на Европското првенство.

Интер се наоѓа во тешка финансиска ситуација. Дека тоа е така, покажува и информацијата што ја објави „Ил Кориере“, дека клубот од Милано за трансферот на Ромелу Лукаку досега на Манчестер јунајтед му платил само 24 милиони евра.

Ромелу Лукаку во летниот преоден рок во 2019 година од Манчестер јунајтед се пресели во Интер. Клубовите се договорија Интер да плати 74 милиони евра за белгискиот напаѓач.

Две години подоцна, во Јунајтед откриле дека Интер досега им платил само 24 милиони евра.

На „Олд Трафорд“ имаат план како да си го наплатат долгот. Ед Вудворд, спортскиот директор, побарал Интер да им го испрати Милан Шкринијар или, пак, Лаутаро Мартинез за да го покрие долгот.

Интер набргу ќе се огласи во јавноста по ова барање од Манчестер.

Инаку, Ромелу Лукаку игра во неверојатна форма во Интер. За 18 месеци одиграл 82 натпревара, постигнал 58 гола и забележал 12 асистенции.