Жан-Пјер Калио, претседателот на францускиот прволигаш, Стад де Ремс, потврди дека нивниот доктор Бернар Гонзалез се самоубил откако имал позитивен тест на корона вирусот.

60-годишниот Гонзалез бил официјален доктор на Ремс 23 години, и според францускиот весник „Ле паризиен“ се решил на овој драстичен потег откако бил позитивен на КОВИД-19. Од клубот, сега официјално ја потврдуваат веста.

„Не можам да најдам зборови, шокиран сум и занемен пред овие вести. Оваа пандемија влијае во срцето на Ремс како клуб. Загубивме голем професионалец, кој беше со нас повеќе од 20 години и секогаш работеше професионално и несебично. Во најтешките моменти за клубот, тој беше волонтер и секогаш мој пријател. Тој ми беше и личен доктор и денеска во мислите ми се неговата сопруга и неговите родители. Ова е драма која не погоди сите нас“, изјави претседателот Калио.

👔 Jean-Pierre Caillot : « Je suis abasourdi, prostré. (…) Sa mission au club de plus de 20 ans a été réalisée avec le plus grand professionnalisme, de manière passionnée et même désintéressée. C’est un drame qui nous frappe. »

L'hommage du Président : https://t.co/86mJedHBer

— Stade de Reims (@StadeDeReims) April 5, 2020

Претседателот на Италијанската фудбалска федерација (ФИГЦ), Габриеле Гравина потврди дека е возможно тековната сезона 2019/20 во Серија А да има завршница во далечниот октомври, поместувајќи го стартот на следната сезона.

УЕФА претходно им се закани на своите членки дека ако шампионатите бидат прекинати предвреме, како што е случај во Белгија, клубовите нема да можат да играат во европските купови и Гравина вели дека посакува сезоната да продолжи на крајот на мај, но тоа ќе зависи од ситуацијата во Италија со корона вирусот, иако се забележува намалување на бројот на новозаболени и на починати во земјата.

„Единствен вистински начин да се реши ваква сериозна ситуација е да се завршат натпреварувањата во 2019/20 оваа година на било кој начин. Работиме со многу хипотези и гледаме како најдобро да се менаџира остатокот од сезоната. Можен датум за рестарт е на 17 мај, но тоа е само можност. Можност е и да се игра до септември или октомври, некако да ја спасиме и следната сезона“, вели Гравина.

Мекларен стана првиот Формула 1 тим кој реагираше на кризата со корона вирусот и одложувањето на стартот на сезоната, со праќање на дел од вработените дома и со намалување на платите на своите возачи. Шефот на тимот Зек Браун, пак, во интервју за „Би-би-си“ призна дека Ф1 е во „необична“ позиција која се заканува за иднината на спортот.

По низата откажувања или одложувања на трките, Мекларен побара од дел од вработените да земат принуден годишен одмор, додека тие кои ќе продолжат да работат ќе добиваат помали плати. Двајцата возачи на тимот, Карлос Саинс Јуниор и Лендо Норис, пак, доброволно ги намалија своите плати.

„Мекларен групацијата привремено ќе прати дел од членовите на тимот на принуден одмор за да ги намали трошоците за време на пандемијата. Го правиме ова за да ги зачуваме работните места на краток рок, за работниците да се вратат на својата работа по опоравувањето на економијата“, се вели во соопштението на тимот.

Шефот на тимот, Зек Браун, пак вели дека за да се „преживее“ корона вирусот, Формула 1 мора да направи големи промени пред утрешниот состанок на шефовите на Ф1 на кој ќе се разгледуваат мерките за штедење.

„Ситуацијата е потенцијално уништувачка за тимовите, и ако биде така за повеќе од два тима, тоа се заканува на Формула 1 како спорт. Во 2021 ќе имаме ограничување на буџетот од 175 милиони долари, но таа сума мора да биде пониска. Не треба да исчезнуваат Формула 1 тимови“, вели Браун.