Светското клупско првенство на ФИФА наместо во декември ќе се одигра во февруари наредната година, тврди „Зидојче Цајтунг“.

На конгресот на ФИФА, одржан во август, првиот човек на ФИФА, Џани Инфантино, најави дека поради пандемијата со коронавирусот, календарот ќе претрпи измени.

Досега се познати само екипи кои обезбедија учество на клупскиот Миндијал: европскиот првак Баерн Минхен, шампионот на Океанија Оукланд сити и домаќинот Ал-Духаил.

Поради пандемијата беа прекинати останатите натпреварувања поради што допрва треба да бидат познати шампионите на Јужна, Северна и Средна Америка, односно Азија и Африка.

НБА лигата се уште не знае кога ќе почне новата сезона. Поради пандемијата со коронавирусот, претходната сезона заврши пред еден месец во „меурот“, во Орландо. Американските медиуми тврдат дека сезоната 2020/2021 ќе се одвива по скратен формат, односно дека наместо предвидените 82, секој тим ќе одигра по 50 натпревари.

НБА планираше новата сезона да започне на 22. декември и секој тим да одигра по 72 натпревари во регуларниот дел. Меѓутоа играчите не се согласуваат со тој предлог, а во моментов најголемата ѕвезда во лигата, Леброн Џејмс, најави дека ќе ги пропушти првите 30 дена.

Најверојатно новата сезона ќе започне на „Денот на Мартин Лутер Кинг“, на 18.јануари 2021, а целата сезона ќе заврши на 23.јули. Планот на НБА е ѕвездите да играат на олимписките игри во Токио.

Фудбалерите на Барселона мора да прифатата намалување на платите, во спротивно клубот во јануари би можел да прогласи банкрот. Оваа сензационална информација ја пренесе Радио Каталонија 1.

Овој извор објави дека Барселона ќе мора да скрати 190 милиони евра од буџетот за плати, односно ќе мора млатите да ги намали за 30 отсто. Доколку не биде постигнат договор со играчите во наредните пет дена, клубот во јануари наредната година би можел да банкротира.

Преговорите за намалување на платите се во тек, но медиумите во Каталонија не се оптимисти дека ќе биде постигнат договор.

„Главен проблем е економската слика на клубот. Пандемијата силно удри по нашиот клуб. Зависиме од туризмот, а него го нема. Мораме да најдеме решение како да го пребродиме ова, во спротивно сè може да се случи“, рекол за Радио Каталонија 1, Карлес Тускетс, в.д. претседателот на Барселона.