Лестер со три гола во првото полувреме го реши победникот на мечот со Вест Бромвич Албион стигнувајќи до 3:0 триумф кој ги носи поблиску до осигурување на место во Лигата на шампиони и во исто време го праќа тимот на Сем Алардајс поблиску до второлигашки живот следната сезона.

Победата беше осигурана за 13 минути – Џејми Варди во 23. минута, Џони Еванс само три минути подоцна и Келечи Ихеаначо во 39. минута ја наполнија мрежата на гостите за сигурен триумф.

Со победата, Лестер останува на третото место со 59 поени, четири помалку од второпласираниот Манчестер јунајтед, но уште поважно четири поени пред Челси и Вест хем на само шест кола пред крајот на сезоната.

Вест Бром, пак, реално многу тешко ќе остане во Премиер лигата. Тие се на 19. место во лигата со 24 поени, девет поени зад Барнли, првиот клуб во безбедната зона.

Сонот за Наполи за пласман во Лигата на шампионите останува жив, стигнаа до фантастична 5:2 победа над Лацио во вистинско гол-шоу на „Диего Армандо Марадона“.

Убедливиот домашен триумф ги остава „партенопеи“ на петтото место на табелата, но сега со 53 поени, само два помалку од Аталанта и Јувентус пред нив и само три зад второпласираниот Милан, додека Лацио остануваат шести со 58 поени.

Намерите на тимот на Рино Гатузо беа јасни од почеток – Лоренцо Инсиње уште во седмата минута од пенал ги донесе во водство, пред во 12. минута Матео Политано да зголеми на 2:0. Инсиње го започна и второто полувреме со гол, овојпат во 53. минута, за 12 минути подоцна, Дрис Мертенс да ја најави катастрофата на Лацио за 4:0.

Чиро Имобиле одговори во 70. минута за 4:1, а само четири минути подоцна Сергеј Милинковиќ-Савиќ намали на 4:2, но Виктор Осимен во 80. минута стави крај на сите надежи за камбек за 5:2.

Македонскиот репрезентативец Елиф Елмас доби шанса кога исходот беше веќе сигурен, откако во 82. минута од мечот го замени Пјотр Зиелински.

Златан Ибрахимовиќ официјално го продолжи договорот со Милан до јуни 2022 година, во зделка за која италијанските медиуми тврдат дека ќе заработи 7 милиони евра.

Договорот на 39-годишниот Швеѓанец требаше да заврши на 30 јуни, и сега тој останува и до својот 40-ти роденден кај „росонерите“.

Ова е втор период на престој во Милан за Ибрахимовиќ по тој од 2010 до 2012 година, откако се врати во клубот во јануари 2020. Оттогаш тој стана еден од клучните играчи на клубот со вкупно 130 настапи, 84 гола и 32 асистенции во дресот на „росонерите“ (во двата периоди).

📸 Pics of the Z-day 🖼️ #SempreMilan #ReadyToUnleash pic.twitter.com/1JhK31AGIA

— AC Milan (@acmilan) April 22, 2021