На денешен ден во 2006 година, во Монако се оддржаа најдраматичните квалификации за славната трка, кога Михаел Шумахер беше наречен „супер-злосторник“ по „паркирањето“ на кривината Раскас и оневозможувањето на Фернандо Алонсо да го комплетира својот најбрз круг.

Германецот дотогаш имаше поставено најбрзо време, но пол-позицијата беше далеку од сигурна, откако Алонсо во Рено, по три победи и две втори места, беше само 0.064 секунди зад него. Пред претпоследната секција на патеката, Шумахер се изврте на кривината Красас и се паркираше оневозможувајќи тие зад него да го комплетираат кругот.

Шуми се правдаше дека направил грешка и не знаел каде ќе заврши, но ривалите (со право) не му веруваа.

„Бидејќи не сме Снежана и седумте џуџиња, сите знаеме дека тоа што го направи е неспортски“, изјави шефот на Рено, Флавио Бријаторе.

Стјуардите се согласија и му ја одземаа пол-позицијата и го пратија на последното место. Алонсо, на крајот, стигна до лесна победа пред Хуан Пабло Монтоја во Мекларен и Дејвид Култард за прв подиум на тогаш новиот тим на Ред бул рејсинг.

Шумахер врати во стил, со петто место во трката и не беше многу загрижен за контроверзите.

„Што и да направите во одреден момент, вашите непријатели мислат нешто друго, а тие кои навиваат за тебе имаат поинакво мислење. Но, тоа е светот во кој живееме“, изјави Шумахер.

Сер Алекс Фергусон пропуштил неверојатна шанса да го донесе Герет Бејл во Манчестер јунајтед бидејќи бил загрижен за неговите дефанзивни квалитети, открива поранешниот менаџер на Саутемптон, Џорџ Барли.

Барли открива дека преговарал со Фергусон за Бејл, но дека не можеле да се договорат за цената.

„Тој беше како крило кое игра како бек. Манчестер јунајтед беа заинтересирани и се сретнав со Сер Алекс и со неговиот извршен директор во еден хотел. Веќе го имавме продадено Тео Волкот за 12 милиони фунти во Арсенал и кога тие понудија 3 или 4 милиони фунти им кажавме дека нема шанси. Беа загрижени за неговите квалитети во одбраната, но ние работевме на тоа“, вели Барли.

На крајот, Бејл замина во Тотенхем во 2007 за 5 милиони фунти, каде што исто така играше како крило, пред Хери Реднап да го постави во нападот. Во 2013 година, тој си замина од „Вајт харт лејн“ за тогаш рекордни 83 милиони фунти, освојувајќи една титула од Ла лига и четири од Лигата на шампионите со „кралевите“.

Италијанските медиуми објавија дека Златан Ибрахимовиќ се вратил во Шведска за третман за повредата на мускулот на ногата на тренинзите со Милан.

Според „Скај спорт Италија“, клубот му дозволил на 38-годишниот ветеран да го напушти тренингот и тој ова попладне се вратил во својата татковина. Првите прогнози велат дека Швеѓанецот го очекува пауза од еден месец, но првичните вести за скината ахилова тетива се покажаа како неточни.

Во клубот очекуваат тој да се врати во Милано следната недела, кога повторно ќе мора да оди во карантин пред да му биде дозволено да се врати на тренинг. Неговата иднина по крајот на сезоната во Серија А останува неизвесна и многумина очекуваат тој да се врати во Шведска во клубот каде што е делумен сопственик, Хамарби.