Нејмар Јуниор е фудбалер за кого фудбалските фанови имаат поделено мислење – додека некои сметаат дека е вистински бразилски гениј, други мислат дека е преценет играч и „дива“ на фудбалскиот терен. Но, без разлика на ова, тој се покажува дека е пред се, човек.

Асот на ПСЖ одамна ја предводи својата добротворна организација „Нејмар Јуниор Институт“, кој помага на 3.000 деца и млади луѓе во Праја Гранде и каде што работат членовите на неговото семејство. Сепак, пандемијата на КОВИД-19 придонесе институтот да е затворен од март 2020, но Нејмар се погрижил вработените да не останат на улица.

Нејмар продолжил да им исплаќа нормална плата и здравствено осигурување на 142 луѓе кои работат во институтот, иако тоа го чини 600.000 бразилски реали (околу 100.000 евра) месечно. Целта е да се заддржи целата структура до крајот на кризата за да се продолжи со активноста.

„Без разлика колку ќе трае пандемијата, работните места и платите на луѓето се сигурни. Нашите услуги се достапни и за власта доколку се потребни“, изјави неговиот татко, Нејмар Сениор.

Андреј Рубљов успеа да го исфрли 11-кратниот шампион од Мастерсот во Монте Карло, Рафаел Надал во класика во петокот, победувајќи по битка во три сета со 6:2/4:6/6:2.

23-годишниот Рубљов фуриозно го отвори мечот, освојувајќи го првиот сет со 6:2, по што во вториот направи предност од 4:2 и изгледаше дека само треба да го комплетира најголемиот триумф во кариерата. Меѓутоа, „кралот“ на земја, Надал успеа да се врати и да ги освои следните четири гема за да израмни на 1:1. Во одлучувачкиот сет, Русинот го искористи лошиот ден на Надал за да го победи тенисерот за кој призна дека е негов тениски идол.

Русинот во полуфиналето ќе игра со Норвежанецот Каспер Руд, инаку тренинг-партнер на Надал, откако тој со 6:4/6:3 го победи шампионот од 2019 година, Италијанецот Фабио Фоњини.

Британецот Ден Еванс, пак, го продолжи настапот од соништата во Монте Карло, откако по елиминацијата на Новак Ѓоковиќ, влезе во полуфиналето со 5:7/6:3/6:4 победа над 11. носител, Белгиецот Давид Гофан.

Еванс водеше со 5:3 во првиот сет, но потоа го загуби од Гофан, кој потоа влезе во катастрофална форма и успеа да освои само 2 од своите 17 брејк топки во мечот.

Првото Мастерс полуфинале во кариерата, Еванс ќе го игра против четвртиот носител, Стефанос Циципас, кој водеше со 7:5 против Алехандро Давидович Фокина, кога Шпанецот се повреди.

Јаја Туре, иако има статус на легенда на Манчестер сити, останува во „незгодни“ односи со англискиот клуб, иако самиот вели дека се обидува да ги поправи односите, почнувајќи со писмо со извинување до Пеп Гвардиола, кого претходно го обвини дека не ги сака африканските фудбалери.

Туре има освоено три титули од Премиер лигата со Манчестер сити, а сега на 37 години, признава дека големиот дел од вината е кај него. Тој вели дека не бил во посета на Сити по повлекувањето во 2018 година и покрај тоа што има доживотен билет и еден терен за тренинг кој го носи неговото име.

Но, во Сити не го заборавиле бурното интервју за „Франс фудбал“ еден месец по неговото заминување. Туре открива дека минатата година пратил писмо до клубот, нудејќи целосно извинување за неговото однесување. Засега, тој не добил одговор и не знае дали тоа стигнало до Гвардиола.

„Тоа интервју беше мојата голема, огромна грешка. Кога ќе му дадеш доверба на некој друг, тогаш таа може да се претвори во нешто што не си посакувал. Знам дека луѓето не беа среќни. Пратив писмо до некои важни луѓе во кои признавам дека бев нечесен кон клубот, но не добив одговор. Сакам мир, не караници. За фановите, за клубот, понекогаш работите мора да се средат“, вели Туре.

Туре, кој сега работи како тренер во Украина со тимот на Олимпик Доњецк, признава дека односите на неговиот агент Дмитриј Селук со Сити не биле најдобри и дека требал да се дистанцира навреме.

„Беше тешко – изгледам како лоша личност поради негативните работи околу мене. Не е во ред да се каже дека сум лоша личност. Не сакав да одговарам, бидејќи фудбалот беше најважен за мене. Но, морав да се справам со работите на поинаков начин. Многу работи можеа да бидат подобри“, додава Туре.