Спорт
Роналдо: Не сакав да заминам од Интер, но не можев да играм под Ектор Купер (видео)
Бразилскиот Роналдо открива дека немал намера да си замине од Интер, но дека се чувствувал „приморан“ на таков потег, откако клубот го поддржал аргентинскиот тренер Ектор Купер по неуспехот да се освои скудетото.
„Тој Интер беше фантастичен. Покрај Бобо Виери го имавме и Кларенс Сидорф и уште многу таленти. Но, повредите спречија да играм често со Виери и ми е жал поради тоа. Кога пристигнав имаше толку голем ентузијазам од фановите и верувавме дека можеме до прекрасни резултати. Гледам сличен ентузијазам и оваа година“, вели Роналдо.
Тој имаше низа повреди на колената во кариерата, од кои најболна беше кинењето на лигаментите само неколку минути по неговиот кам-бек во меч од Копа Италија против Лацио.
„Веднаш сфатив дека коленото ми откажа. Таква повреда немаа видено во фудбалот и првите 10 дена бев во мрак и тага. Но, некако успеав да се вратам“, објаснува Бразилецот.
„Ил феномено“ беше блиску да им донесе скудето на Интер на 5 мај 2002 година, но тогаш тие загубија со 4:2 од Лацио и Јувентус ги прескокна за титулата во последното коло.
„Честопати размислував за тој меч. Мислам дека имавме преголема самодоверба, а Купер постави погрешен тим, со премногу играчи во средниот ред. Тоа ми е едно од најголемите разочарувања во животот. Не сакав да си одам од Интер и сакав таму да ја завршам кариерата. Не можев ниту да одам кај претседателот Морати и да побарам да го отпуштат тренерот, бидејќи тоа не е мој стил. Но, со Купер не можевме да направиме ништо друго. Тој не се однесуваше добро со мене. Не знам дали со титулата ќе размислував поинаку. Кога Морати го поддржа тренерот, морав да заминам, бидејќи бев горд. Градот кој ме сакаше, одеднаш ме мразеше. Морав да добијам полициска заштита“, објаснува Роналдо.
За да биде ситуацијата побизарна, Морати на крајот го отпушти Купер во октомври 2003.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.